Ciidamada Dowladda oo Burburiyay Suuqa Siinaay

Saaka aroortii hore ayaa ciidamada dowladda Soomaaliya waxay bilaabeen howlgal ballaaran oo burburin ah oo ka socda Suuqa Siinaay ee magaalada Muqdisho.

Goobjoogayaal ayaa sheegay in cagaf-cagafyo culus lagu soo daad gureeyay suuqa, halka waddooyinka soo gala deegaankaas lagu xiray xalay saqdii dhexe si aysan dadka iyo ganacsatadu u soo galin.

Axmed MacallinCumar oo Goobjoog la hadlay , ayaa yiri: “Waxaa muuqata in howlgalka uu si qorshaysan u dhacay, iyadoo aysan jirin cid ka socota mucaaridka dowladda oo goobta jooga. Dhulka suuqa waxaa durba la sheegay in iibkiisu bilowday.”

Sidoo kale, ciidamada dowladda ayaa la sheegay inay dul dhigeen ciidan xoogan guriga xildhibaan Yaasiin Fareey, oo dhowrkii maalmood ee lasoo dhaafay ka soo horjeeday burburinta suuqa.

Ganacsatada suuqa ayaa ka walaacsan khasaaraha hantiyeed ee ka dhashay burburinta, iyagoo sheegay in aan la siin ogeysiis ku filan ama xal kale oo beddel ah.