Wasiirka Difaaca Mali, Sadio Camara, ayaa lagu dilay weerarro waaweyn oo gilgilay dalka Mali, kuwaas oo lagu beegsaday magaalooyinka Bamako, Kati, Gao iyo Kidal.
Weeraradan oo loo arko kuwii ugu xooganaa ee dalkaasi wajahdo sanado badan, ayaa waxaa ka dambeeyay kooxda JNIM ee xiriirka la leh Al-Qaacida iyo fallaagada Azawad Liberation Front (FLA).
Wararkii ugu dambeeyay ayaa sheegaya in weerarrada lagu bartilmaameedsaday saldhigyo ciidan, xarumo dowladeed iyo goobo istiraatiiji ah, iyadoo qaraxyo iyo dagaallo culus laga soo sheegayo meelo badan.
Sadio Camara ayaa la sheegay inuu ku dhintay weerar lagu qaaday xarun ciidan oo ku taalla Kati.
Kooxda JNIM ayaa sheegatay mas’uuliyadda qayb ka mid ah weerarrada, halka FLA ay la wareegtay deegaanno waqooyiga Mali ah, gaar ahaan agagaarka Kidal, taasoo muujinaysay iskaashi cusub oo u dhexeeya kooxaha hubeysan.
Dowladda Mali ayaa bilowday hawlgallo jawaab celin ah, iyadoo ciidamo dheeraad ah loo daabulay furimaha dagaalka, halka bandow lagu soo rogay qaybo kamid ah dalka.
Xaaladda amni ee Mali ayaa weli aad u kacsan, waxaana jira cabsi laga qabo in weerarradan ay horseedi karaan qalalaase siyaasadeed iyo mid amni oo horleh oo saameeya gobolka Saaxil oo dhan.
From the comments