Nin ku dhashay Soomaaliya oo lagu eedeeyay weerar tooriyeeyn ah oo ka dhacay London

Waxaa ka dhacay magaalada London, gaar ahaan xaafadda Golders Green ee waqooyiga magaalada, weerar tooriyeeyn ah oo lagu dhaawacay laba nin oo ka tirsan bulshada Yuhuudda, falkaas oo ay boolisku ku tilmaameen mid argagaxiso.

Labada nin ee la weeraray ayaa lagu kala magacaabaa Shilome Rand oo 34 jir ah iyo Moshe Shine oo 76 jir ah. Waxaa goobta lagu siiyay daryeel degdeg ah ka hor inta aan loo gudbin isbitaalka, halkaas oo la sheegay in xaaladdoodu ay hadda deggan tahay.

Booliska ayaa gacanta ku dhigay nin 45 jir ah oo haysta dhalashada Britain, kuna dhashay Soomaaliya, kaas oo looga shakisan yahay inuu ka dambeeyay weerarka.