Warsaxaafadeed kasoo baxay Wasaaradda Warfaafinta ee Dowladda Federaalka Soomaaliya ayaa lagu sheegay in dowladdu ay ixtiraamayso xuquuqda dastuuriga ah ee shacabka ee isu soo baxa nabdoon iyo cabbirka aragtida siyaasadeed, balse ay si adag uga hortagayso wax kasta oo halis gelin kara amniga iyo kala dambeynta caasimadda Muqdisho.
Qoraalka ayaa lagu sheegay in dowladda ay u qoondeysay garoonka Injineer Yariisow ee degmada Cabdicasiis goobta rasmiga ah ee bannaanbaxyada nabdoon lagu qaban karo, hase yeeshee mucaaradka lagu eedeeyay inay ku dhawaaqeen 22 goobood oo kala duwan oo mudaharaadyo laga abaabulayo gudaha Muqdisho, taas oo dowladda ku tilmaantay qorshe khatar ku ah amniga iyo isu socodka magaalada.
Dowladda ayaa sidoo kale sheegtay inay ka walaacsan tahay qorshaha mudaharaadyo soconaya shan maalmood oo xiriir ah, iyadoo xustay in warbixinno amni ay tilmaamayaan in xubno hubeysan oo lala xiriirinayo mucaaradka lagu arkay qaybo kamid ah magaalada, gaar ahaan goobaha shacabka.
From the comments