Qarax miino oo Beledweyne ku dilay hal qof, laba kalena dhaawacay

BELEDWEYNE (Goobjoog News) — Ugu yaraan hal qof ayaa ku dhintay, laba kalena way ku dhaawacmeen kaddib markii miino dhulka lagu aasay ay saaka oo Arbaco ah ku qaraxday goob dhisme oo ku taalla xaafadda Buundo Weyn ee magaalada Beledweyne, xarunta gobolka Hiiraan.

Dhacdada ayaa la sheegay inay timid xilli shaqaalaha dhismaha ay ku guda-jireen dejinta iyo hagaajinta qalabka howsha, waxaana goobta si degdeg ah uga dhashay khasaare soo gaaray dadkii goobta ku sugnaa.

Ciidamada ammaanka ee dowladda federaalka iyo kuwa booliska deegaanka ayaa gaaray goobta uu falku ka dhacay, iyagoo bilaabay hawlgallo baaritaan ah si loo ogaado nuuca qaraxa iyo ciddii halkaas ku aastay miinada.