Hay’adda Caalamiga ah ee Socdaalka (IOM) ayaa ka digtay in ku dhowaad 874,000 oo qof ay ku barakici karaan gudaha Soomaaliya muddada u dhexeysa bilaha Oktoobar iyo Diseembar 2026, sababo la xiriira roobab xooggan iyo kor u kaca heerarka biyaha webiyada oo laga cabsi qabo inay sababi karaan fatahaado.
Qiyaas ay si wadajir ah u diyaariyeen IOM iyo Golaha Qaxootiga Denmark ayaa muujinaysa in ilaa 874,319 qof ay halis ugu jiraan barakac, iyadoo fatahaaduhu sabab u noqon karaan boqolkiiba 92 ee barakaca la saadaaliyay.
Digniintan ayaa imaneysa xilli Soomaaliya ay wajahayso roobab la filayo inay ka badan yihiin heerarkii caadiga ahaa, iyadoo bulshooyin badan ay horeba ula tacaalayeen abaaro iyo barakac soo noqnoqday.
Hay’addu waxay sheegtay in magaalooyinka Beledweyne iyo Gaalkacyo ay ka mid yihiin meelaha ay khatartu ugu badan tahay, iyadoo qiyaastii 229,000 oo qof oo ku nool Beledweyne iyo 82,000 oo qof oo Gaalkacyo ku sugan ay halis ugu jiraan inay guryahooda ka barakacaan.
Waxaa sidoo kale jira calaamado muujinaya kor u kaca biyaha webiyada Jubba iyo Shabeelle, halka roobab xooggan oo ka da’ay Baydhabo ay waxyeello u geysteen guryo, isla markaana qoysas ku khasbeen inay ka guuraan xaafado ka mid ah magaalada.
IOM ayaa intaas ku dartay in fatahaaduhu burburin karaan dalagyada beeraha, waxyeello u geysan karaan hab-nololeedka dadka, wasakheyn karaan ilaha biyaha, isla markaana carqaladeyn karaan helitaanka adeegyada caafimaadka iyo adeegyada kale ee aasaasiga ah.
Dadka ku nool xeryaha barakacayaasha ayaa si gaar ah ugu nugul xaaladdan, maadaama qaar badan ay wajahayaan biyo nadiif ah iyo adeegyo fayadhowr oo aan ku filnayn.
Dhanka diyaar-garowga, IOM waxay sheegtay inay heshay keliya 14.4 boqolkiiba lacagta dhan 16.62 milyan oo doollar ee loo baahan yahay si loogu diyaar garoobo fatahaadaha loogana jawaabo saameyntooda.
Hay’addu waxay ku baaqday in si degdeg ah loo helo taageero dhaqaale oo dheeraad ah, si loo xoojiyo nidaamyada digniinta hore, loo diyaariyo waddooyinka daad-gureynta, loona helo hoy ku-meel-gaar ah, biyo nadiif ah iyo adeegyo caafimaad oo loogu talagalay dadka ay musiibadu saameyn karto.
IOM ayaa ka digtay in haddii aan tallaabooyin degdeg ah la qaadin, fatahaaduhu ay sii xumeyn karaan xaaladda bani’aadannimo ee Soomaaliya, gaar ahaan bulshooyinka horey ugu dhibaataysnaa abaaraha, saboolnimada iyo barakaca soo noqnoqday.
From the comments