Guddoonka barlamaanka Soomaaliya oo soo dhoweeyay wada hadalada Puntland

Guddoonka Golaha SHacabka Jamhuuriyadda Federaalka Soomaaliya ayaa soo dhoweeyay doorkii muuqday ee ay qaateen xildhibaanada barlamaanka Federaalka ee ka soo jeeda Puntland ayaa lagu yiri  war-saxaafadeed ka soo baxay xafiiska guddoomiyaha baarlamaanka Federaalka Soomaaliya Prof. Maxamed Sheekh Cismaan Jawaari.

Guddoon ahaan aad ayaan u soo dhoweyneynaa shaqada muuqata ee ay xildhibaanadu hadiiba u guntadeen xalinta khilaafaadka soo if-baxay tan iyo  bartamihii  bishan August , isla markaana  ay ku abuureen jawi isu  soo dhowaansho ah, kaasoo  loogu gogol xaarayo wada hadal toos ah oo dhex mara xukuumadda Federaalka ee Soomaaliya iyo dowlad-goboleedka Puntland.

Sida uu qabo Qodobka 61aad ee dastuurka dalka xildhibaanada Golaha SHacabku waxay u gudanayaan waajibaadkooda sida ay danta Qaranku ku jirto, iyadoo uu waajib gaar ah ka saaran yahay deegaan cod-bixiyeyaasha ay ka soo jeedaan, wuxuu guddoonka Golaha SHacabka ku bogaadinayaa xildhibaanada sida hagar la’aanta ah isaga xilqaamay inuu wada hadal u bilowdo DFS iyo Puntland.