Faahfaahino dheeri ah oo kasoo baxaya Shil khasaare sababay oo ka dhacay duleedka Muqdisho

Inta la xaqiijiyay Saddex ruux ayaa ku geeriyootay gaari nooca raaxada ah oo shil ku galay inta u dhaxeysa deegaanka Jasiira iyo Magaalada Muqdisho.

Saddexda ruux ee geeriyootay ayaa kala ahaa Askari ka tirsan ciidanka xoogga dalka oo gaariga waday iyo laba ruux oo dumar ah oo gaariga saarnaa.

Gaariga oo ku socday Xawaare Sare ayaa jidka ka baxay taasoo keentay in uu guud ahaantiisa burburo.

Dhalinyarada ayaa deganaa degmada Wadajir halkaasoo xalay Meydkooda uu ku baryay. shalay oo Jimco aheyd ayay dalxiis u aadeen xeebta deegaanka Jasiira.

Goobjoogayaal ayaa Goobjoog u xaqiijiyay in gaariga xilliga uu rogmanayay uu tartan kula jiray gaari kale oo la socday oo asna ay wateen dhalinyaro dalxiis u aaday deegaanka Jasiira.

Waxaa maalmihii lasoo dhaafay kordhay Shilalka ka dhacaya deegaanka Jasiira. waxaa loo aaneynaya dhalinyarada oo gawaarida u wadda si xowli ah.