Muqdisho, 1 Juun 2026 – Dowladda Mareykanka ayaa ku baaqday in la muujiyo is-xakamayn iyo in dib loogu laabto wadahadal, xilli ay sii kordhayaan walaacyada la xiriira xaaladda siyaasadeed ee Soomaaliya.
Qoraal ay maanta soo saartay Safaaradda Mareykanka ee Muqdisho ayaa lagu sheegay in dhammaan dhinacyada ay khuseyso arrimaha siyaasadda Soomaaliya looga baahan yahay inay ka fogaadaan tallaabo kasta oo horseedi karta rabshado ama xasilooni darro.
Mareykanka ayaa carrabka ku adkeeyay in la ilaaliyo nabadda iyo amniga, isagoo ugu baaqay hoggaamiyeyaasha siyaasadda iyo daneeyayaasha kala duwan inay muujiyaan dulqaad iyo masuuliyad, kana fogaadaan hadallada iyo ficillada sii hurin kara xiisadaha jira.
Sidoo kale, dowladda Mareykanka ayaa sheegtay in wadahadalka iyo iskaashigu yihiin waddada ugu habboon ee lagu gaari karo xal waara, laguna ilaalin karo xasilloonida dalka. Qoraalka ayaa lagu dhiirrigeliyay dhammaan dhinacyada inay si degdeg ah ugu laabtaan miiska wadahadalka si loo helo is-afgarad ku saleysan danaha shacabka Soomaaliyeed.
Baaqan ayaa ku soo beegmaya xilli ay sii kordhayaan khilaafaadka siyaasadeed ee ku saabsan hannaanka doorashooyinka iyo jihada siyaasadeed ee dalka, kuwaas oo sababay walaac gudaha iyo dibaddaba ah.
Beesha caalamka ayaa muddooyinkii dambe si joogto ah ugu baaqaysay in arrimaha muranka dhaliyay lagu xalliyo wada-hadal iyo is-afgarad, si looga fogaado xaalad amni iyo mid siyaasadeed oo sii murugsanta.
From the comments