Jabuuti, Sebteembar 23, 2026: Urur-goboleedka IGAD ayaa walaac xooggan ka muujiyay kororka xiisadaha ka taagan waqooyiga Itoobiya, iyadoo ay soo baxayaan warar ku saabsan dagaallo dib u soo cusboonaaday, la wareegidda garoomo diyaaradeed oo rayid ah iyo hakad ku yimid adeegyada duulimaadyada.
IGAD ayaa dhinacyada ugu baaqday inay joojiyaan colaadda, muujiyaan is-xakameyn buuxda, kana fogaadaan tallaabo kasta oo halis gelin karta nolosha dadka rayidka ah ama wiiqi karta geeddi-socodka nabadda.
Ururku wuxuu xusay in Heshiiskii Pretoria ee 2-dii Nofeembar 2022, kaas oo lagu gaaray joojinta colaadda, uu weli yahay qaabka lagu heshiiyey ee wax looga qabanayo arrimaha aan weli xal loo helin, isagoo ku baaqay in si buuxda loo ilaaliyo qodobbada heshiiska.
IGAD ayaa sidoo kale ku baaqday in dhinacyadu si degdeg ah ugu laabtaan wada-hadal toos ah, iyadoo dalalka deriska ah loogu baaqay inay taageeraan dadaallada lagu dejinayo xiisadda ayna ka fogaadaan tallaabooyin xaaladda sii xumeyn kara.
Urur-goboleedka ayaa sheegay inuu taageersan yahay dadaallada diblomaasiyadeed ee Midowga Afrika iyo ilaalinta natiijooyinkii laga gaaray Heshiiskii Pretoria, isagoo ka digay in dib ugu noqoshada dagaal baahsan ay cawaaqib culus ku yeelan karto Itoobiya iyo guud ahaan gobolka.