Hay’adaha Dastuurka oo Nuqullo ka mid ah Dastuurka ku Wareejiyay Bankiga Dhexe ee Soomaaliya

Muqdisho — Hay’adaha u xilsaaran dib-u-eegista iyo hirgelinta Dastuurka Soomaaliya ayaa nuqullo ka mid ah Dastuurka Jamhuuriyadda Federaalka Soomaaliya ku wareejiyay Bankiga Dhexe ee Soomaaliya, si kor loogu qaado aqoonta iyo fahamka Dastuurka ee shaqaalaha bankiga.

Ku-simaha Xoghayaha Guud ee Guddiga Dib-u-eegista iyo Hirgelinta Dastuurka, Daauud Daahir Xasan, Agaasimaha Guud ee Arrimaha Dastuurka, Saalax Xiirey Kheyre, iyo mas’uuliyiin kale ayaa nuqullada Dastuurka ku wareejiyay Guddoomiye Ku-xigeenka Bankiga Dhexe, Cali Yaasiin.

Kulanka oo ka dhacay xarunta Bankiga Dhexe ee Soomaaliya ayaa looga hadlay xoojinta wada-shaqeynta hay’adaha dastuurka iyo Bankiga Dhexe, gaar ahaan sidii loo horumarin lahaa aqoonta iyo fahamka shaqaalaha bankiga ee Dastuurka dalka.