Shirka golaha Wasiirada ayaa sidoo kale looga hadlay, soo bandhigista Sanduuqa Horumarinta degmooyinka iyo xoojinta xiriirka Isku xirka iyo Hay’adaha Dowladda dhexe ee Puntland iyo warbixin ay golaha la wadaageen xubnaha ka mid ah golaha Wasiirada oo safar ku tegay gobolka Mudug, kuwaas oo golaha ka horjeediyay xaalada amni iyo midda abaaraha ee ka jira gobolka Mudug oo kamid ah meelaha sida weyn ay u saamaysay.

Wasaaradda shaqada shaqalaha dhallinyarada iyo ciyaaraha, ayaa golaha usoo gudbisay talo-soojeedinta iyo waxka bedelka maalmaha shaqada waxaana goluhu cod aqlabiyad ah ku ansixiyey, in maalmaha shaqada ay noqdaan 5 cisho, iyadoo wakhtiga shaqada uu yahay 8-da subaxnimo illaa 4-ta galabnimo si waafaqsan xeerka shaqaalaha Rayidka ah, maalmaha fasaxa ee Puntland waxay noqon doonaan Jimcaha iyo Sabtida.

Waxaa si gaar ah loo tixgelinayaa in Hay’adaha Dowladda ee bixiyaa adeegyada lagama maarmaanka ah sida dekadaha, Garoomada, caafimaadka, kastamyada inay u shaqeeyaan si joogto ah aan maalmahooda fasaxa wax iskabedeli doonin.

Waxka bedelka maalmaha shaqada wuxuu dhaqangelayaa marka Xeerka LR 12, ee Shaqaalaha Rayidka ah wax ka bedel lagu sameeyo ayna ansixiyaan Golaha Wakiillada Dowladda Puntland.