Golaha wasiirada Soomaaliya oo meel-mariyay hindise sharciyeedka waxbarashada
[huge_it_slider id=”58″]
Ku-simaha Ra’iisul Wasaaraha ahna Ra’iisul Wasaare-ku-xigeenka Xukuumadda Federaalka Soomaaliya Mudane Ridwaan Xersi Maxamed ayaa maanta shir guddoomiyey kulanka caadiga ah ee Golaha Wasiirada Xukuumadda Federaalka Soomaaliya, waxaana shirka lagu meel mariyay sharciga Waxbarashada Qaranka, waxana sidoo kale warbixin looga dhagaystay guddiga gurmadka abaaraha.
Gabagabadii kulanka kaddib, ayaa waxaa warbaahinta la hadlay Afhayeenka Xukuumadda Ridwaan Xaaji Cabdiweli, isaga oo xusay in goluhu ay ka doodeen qodobo dhowr ah oo ay ugu horeysay sharciga Warbaahinta iyo Waxbarashada, waxaana falanqeyn dheer kadib si buuxda loo meel mariyay sharciga Waxbarashada Qaranka.
Wasiirka Beeraha Mudane Cabdi Axmed Baafo oo dhankiisa Warbaahinta la hadlay ayaa sheegay booqashooyin loogu kuurgalayo xaaladaha deegaanada ay sida daran u saameeyeen abaaruhu in ay booqdeen, isla markaana ay kusoo arkeen xaalado bani’aadamnimo oo u baahan gurmad deg deg ah.
“Waxaa noo suura galay safarkii ugu horeeyay oo gobollada Gedo iyo Bakool ugu ambabixinay saddex boqol oo tan (300) oo loogu talagalay degmooyinka go’doonka ku jira, labada beri oo soo socotana waa ay gaari doonaan, waxaana raashinkaas galbiyay Ciidanka Xogga dalka Soomaaliyeed, guddigu wuxuu sidoo kale booqday gobollada Bakool iyo Gedo gaar ahaan degmooyinka Xudur iyo Doolow” ayuu yiri Wasiir Baafo.
Sidoo kale guddiga ayaa u mahadceliyay Madaxweynaha Jamhuuriyadda Jabuuti Mudane Ismaaciil Cumar Gelle oo gurmad ugu deeqay dadka ku dhibaataysan degmada Buulo-burde oo kamid ah goobaha ay ka jiraan abaaruhu.
Ugu danbeyn, Shirka ayaa looga dooday Hindisa-sharciyeedka Saxaafadda kaas oo ah mid waa cusub u billaabaya saxaafadda Soomaaliya, siinayana xorriyad aan wali soo marin, isla markaana qeexaya xuquuqda iyo masuuliyaadka ka saaran dalka iyo bulshada ay warka u gudbinayaan, golaha wasiirada ayaa isku af gartay in ay dib u dhigaan ansixinta xeerka saxaafada, isla markaana la iskugu yimaado maalinta isniinta ee soo socota.