Degdeg: Safiirka Mareykanka ee Soomaaliya oo Soo Gaaray Muqdisho, Akhriso Taariikhdiisa

War kasoo baxay safaaradda Mareykanka ee Soomaaliya ayaa lagu shaaciyey in caasimadda Muqdisho uu yimid safiirkeeda cusub Ambassador Larry E. André, Jr iyada oo lagu wado inuu warqadaha aqoonsiga u gudbiyo madaxda dowladda federaalka ah.

Larry E. André oo ah diblomaasi khibrad weyn leh ayaa horay safiir uga soo noqday dalalka Djibouti iyo Mauritania, waxaa uu kale arrimaha Soomaaliya u qaabilsanaa safaaradda Mareykanka ee Kenya muddadii u dhaxeysay 2006-2008, isaga oo ka qeyb galay shirar badan oo looga hadlayey dib u heshiisiinta Soomaaliya, waxaa uuna ahaa maskaxda ka dambeysay in la dhiso unug u gaar ah Soomaaliya, taas oo markii dambe noqotay hawlgalka Mareykanka ee Soomaaliya.

Ambassador Larry E. André, Jr ayaa sheegay inuu diyaar u yahay ka shaqeynta sidii isugu soo dhowyn lahaa labada dal ee Soomaaliya iyo Mareykanka.

Ambassador André waxaa uu kasoo shaqeeyey dib u dhiska dagaalka kadib ee dalka iyo Chad iyo Senegal, waxaa  uu Master of Business Administration (MBA) ka heystaa Arizona State University/Thunderbird School of Global Management (1988) halka  B.A. ee xagga siyaasadda uu ka heysto Claremont McKenna College (1983), waxaa uu ku hadlaa French, waa xaasle, hal wiil leh.

Goobjoog News