Ciidamada xoogga dalka ee kusugan deegaanka Janaale ee gobolka Shabeellada hoose ayaa sheegay in maanta Tuulooyin u dhow Janaale ay kala wareegeen Al-shabaab, kadib howlgallo ay qaadeen ciidammada, ay ku gaareen Tuulooyinka dhowr ah.
Tuulooyinka ay ciidamadu gaareen ayaa waxaa kamid ah Buulo Arundi, Malable, Siigaale, Busley, Daa’uud iyo Beeraha-Baay waxaana sidoo kale ciidanku ay sheegeen intii howlgalka ay ku jireen in ay burburiyeen fariisimo ay lahaayeen Al-shabaab.
Howlgalka ayaa waxaa fuliyey ururka 84-aad ee guutada 14-ka October, waxaana hoggaaminaayey Cali Mahdi Beerdiide oo ah Abaanduulaha ciidanka sidoo kale ahna gudoomiye ku xigeenka dhinaca amniga iyo siyaasadda ee deegaanka Janaale.
Ciidamada dowladda ayaa inta badan waxaa ay howlgallo ay ka sameeyaan gobolka Shabeellada hoose, waxaana mararka qaar ka dhaca dagaal u dhaxeeya ciidanka xoogga dalka iyo Al-shabaab oo ku sugan degmooyin ka tirsan gobolka ah.
Goobjoog News
