Soomaaliya iyo Ciraaq oo ka wada-hadlay xoojinta iskaashiga dhinacyada difaaca iyo tababarrada 

Wasiirka Gaashaandhigga Xukuumadda Federaalka Soomaaliya, Mudane Axmed Macallin Fiqi, ayaa kulan rasmi ah la yeeshay dhiggiisa dalka Ciraaq, Mudane Thaabit Maxamed Al-Cabaasi, kadib markii uu booqday xarunta Wasaaradda Gaashaandhigga ee Jamhuuriyadda Ciraaq.

Kulanka oo ay ka qeyb-galeen saraakiil sar sare oo Ciraaqiyiin ah ayaa lagu falanqeeyay xoojinta xiriirka labada dal iyo dardargelinta iskaashiga dhinacyada amniga, difaaca, tababarka iyo is-weydaarsiga khibradaha ciidamada.

Wasiir Axmed Macallin Fiqi ayaa uga mahadceliyay soo dhaweynta iyo martiqaadka uu u sameeyay dhiggiisa Ciraaq, isagoo xusay in ay ka go’an tahay Dowladda Federaalka Soomaaliya in la dhiso iskaashi waara oo walaaltinimo iyo istaraatiiji ah.

Dowladda Ciraaq ayaa berisamaadkii Soomaaliya siin jirtay taageero waxbarasho iyo tababarro ciidan, waxayna labada dal ahaayeen xulufo aad isugu dhow, balse burbur lixaad leh iyo dagaallo sokeeye ayaa naafeeyay Muqdisho iyo Baqdaadba.