Ra’iisul Wasaaraha Dowladda Federaalka Soomaaliya, Xamsa Cabdi Barre, ayaa magaalada Laascaanood kaga qaybgalay munaasabadda sanad-guurada koowaad ee maamulka Waqooyi Bari, iyadoo ay sidoo kale ka qeybgaleen mas’uuliyiin ka tirsan dowladda federaalka, hoggaanka maamulka iyo boqolaal qof oo shacabka ah.
Khudbad uu ka jeediyay munaasabadda, Ra’iisul Wasaaruhu wuxuu sheegay in maamulka Waqooyi Bari uu sameeyay horumar tan iyo markii la aas aasay sanad ka hor.
Wuxuu xusay in Dowladda Federaalka ay sii wadi doonto taageerada ay siiso maamulka, isaga oo ku tilmaamay mid kaalin ku leh midnimada dalka.
Xamsa Cabdi Barre ayaa hambalyo u diray shacabka ku nool deegaannada Waqooyi Bari, wuxuuna ku ammaanay dadaallada horumarineed ee laga sameeyay maamulka muddadii uu jiray.
Sidoo kale, wuxuu ku boorriyay maamulka iyo bulshada deegaanka inay xoojiyaan wada noolaanshaha, deris-wanaagga iyo xiriirka ay la leeyihiin dowlad-goboleedyada kale ee dalka.
Ra’iisul Wasaaruhu wuxuu sidoo kale ka hadlay arrimaha siyaasadda dalka, isagoo soo hadal qaaday doorashadii qof iyo cod ee dhowaan ka dhacday Galmudug.
Wuxuu sheegay in dowladda federaalku qorsheyneyso in doorashooyin la mid ah laga qabto deegaanno kale si shacabka loogu kordhiyo ka qaybgalka geeddi-socodka dimuqraadiyadeed.
Dhanka amniga, Ra’iisul Wasaaruhu wuxuu sheegay in Soomaaliya ay weli wajahayso caqabado ay ka mid yihiin kooxaha hubeysan iyo arrimo kale oo, sida uu sheegay, caqabad ku ah horumarka dowladnimada iyo xasilloonida dalka.
Intii ay munaasabaddu socotay, xubno ka tirsan Golaha Wasiirrada Dowladda Federaalka ayaa sidoo kale ka hadlay mashaariicda horumarineed ee dowladda ay ka waddo deegaannada maamulka Waqooyi Bari, iyagoo faahfaahin ka bixiyay heerarka ay marayaan qaar ka mid ah mashaariicdaas.