Ra’iisul Wasaare Xamsa oo Muqdisho ku qaabilay wafdi ka socda Boqortooyada Sacuudiga

Muqdisho: Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa xafiiskiisa ku qaabilay wafdi heer sare ah oo ka socda Boqortooyada Sacuudiga, kuwaas oo uu hoggaaminayay Xoghayaha Guud ee Xarunta…

Ra’iisul Wasaare Xamsa oo Muqdisho ku qaabilay wafdi ka socda Boqortooyada Sacuudiga

Muqdisho: Ra’iisul Wasaaraha Xukuumadda Federaalka Soomaaliya, Xamsa Cabdi Barre, ayaa xafiiskiisa ku qaabilay wafdi heer sare ah oo ka socda Boqortooyada Sacuudiga, kuwaas oo uu hoggaaminayay Xoghayaha Guud ee Xarunta Ilaalinta Fikirka iyo Ka-hortagga Xagjirnimada, Sareeye Gaas Cabdullaahi bin Haadi Al-Haajiri.

Kulanka ayaa diiradda lagu saaray xoojinta iskaashiga Soomaaliya iyo Sacuudiga ee la-dagaallanka fikirka xagjirka ah, ciribtirka fikradaha ay faafiyaan kooxaha Khawaarijta iyo sidii bulshada Soomaaliyeed looga wacyigelin lahaa halista xagjirnimada.

Ra’iisul Wasaare Xamsa ayaa wafdiga la wadaagay dadaallada iyo qorshayaasha dowladda Soomaaliya ee lagula dagaallamayo fikirka xagjirka ah, isaga oo xusay baraarugga bulshada Soomaaliyeed ee ku aaddan khatarta kooxaha Khawaarijta.

Dhankooda, wafdiga Sacuudiga ayaa sheegay inay Soomaaliya ka taageerayaan dhinacyada khibradda iyo waayo-aragnimada, farriimaha wacyigelinta, tababarrada shaqaalaha iyo taageerooyinka kale ee lagu ciribtirayo fikradaha xagjirka ah.

Sidoo kale, waxaa la isku raacay in Xarunta Ilaalinta Fikirka iyo Ka-hortagga Xagjirnimada ee Boqortooyada Sacuudiga ay iskaashi iyo wada-shaqayn la yeelato Xarunta Qaran ee Tubsan ee Xafiiska Ra’iisul Wasaaraha, oo dowladda Soomaaliya u qaabilsan la-dagaallanka fikirka xagjirka ah.

Ugu dambayn, Ra’iisul Wasaare Xamsa Cabdi Barre ayaa uga mahadceliyay dowladda Sacuudiga taageerada ay siiso Soomaaliya, gaar ahaan dhinacyada amniga, dhaqaalaha iyo garab istaagga shacabka Soomaaliyeed.

Goobjoog Newsletter

Ka hel Goobjoog wixii cusub.

Warar iyo falanqayn, iimaylkaaga.

From the comments