Shacabka ku nool dowlad goboleedka Puntland waxaa ay dhagta u taagataan natiijada doorashada madaxtinnimada ee dhici-doonta 8-da bishan.
Haddaba, maanta waxaa ay aheyd maalin aad mashquul u ah, arrimaha dhacay waxaa ka mid ahaa:
1. Go’aanka Ka Dhan Ah Muqdisho: Dowlad goboleedka Puntland ayaa mar kale ku celisay ku wargelinta hay’adaheeda amniga ee ahaa iney dib u celiyaan saraakiisha dowladda federaalka ah ee tagaya magaalada Garoowe.
2. Ammaanka Garoowe: Ciidamada ammaanka Puntland ayaa bilaabey inay adkeeyaan ammaanka magaalada Garoowe, ciidamada howsha loo xilsaaray ayaa kala ah: PSF-ta , Booliiska , Daraawiishta iyo PMPF-ta.
3. Diiwaangellinta Murashaxiinta: Inta badan murashaxiinta waxaa ay shubeen lacagtii lagu xiray, madaxweynnimada oo $20,000 iyo ku-xigeenka oo $10,000 ah.
Murashaxiinta kursiga madaxweynaha u tartamaya ee lacagta shubay waxaa ka mid ahaa: Cali Xaaji Warsame, Maxamuud Jebiye, Siciid Dheere, Siciid Deni , Cabdi Faarax Juxa, Asad Diyaano, Faarax Cali shire, Maxamuud Cabdi Axmed , Maxamed Siciid Xirsi (Moorgan), Maxamed Axmed Jaamac (Shaale), Cali Cabdi Awaare, Khaliif Ciise Mudan iyo Cabdi Samad Maxamed Gallan.
4. Khudabadaha: Murashax walbo oo u tartamaya labada kursi waxaa uu berri ka hor khudbeyn-doonaa wakiillada Puntland, muddo 15 daqiiqo ah.
5. IGAD OO Garoowe Gaartay: Wafti ka socda urur goboleedka IGAD ayaa gaaray magaalada Garoowe, waxaana lagu wadaa inay korjoogayaal ka noqdaan doorashada 8-da Janaayo.
Goobjoog News
