U bood dhigaalka

Madoobe Nuunoow “Wada hadal ayaan la galeynaa maamulka Jubba iyo xubnaha dhisaya Sedaxda gobal” Dhageyso

Sheeko:Dalka

Hogaamiyaha maamulka Koonfur Galbeed ee Lixda gobal Madoobe Nuunoow Maxamed ayaa sheegay in wada hadal ay la gali doonaan maamulka KMG ee Jubba, iyo sidoo kale xubnaha ku howlan dhismaha maamulka Sedaxda gobal ee Koonfur Galbeed.

Waxa uu sheegay in dhawaan wada hadal ay la galeen xildhibaano ka mid ah baarlamaanka Soomaaliya, ayn ku heshiiyeen qodobo u badan in la wada hadlo.

“Todobaadkii lasoo dhaafaay waxaan wada hadal la galnay wafdi ka socda dowladda Federaalka una badan xildhibaano kuwaa oo Baydhaba jooga, waxaan ku heshiinay in maamulkeena Lixda gobal iyo dowladda Federaalka wada furno wada hadal aynu dhexdeena isku fahmeeno, waxaana go’aan sanay maamulkeena inaan furno gogol wada hadal loogu baaqayo dhamaan qeybaha kasoo horjeeda fikirka Lixda gobal, laga soo bilaabo maamulka KMG ee Jubba, xubnahaan dhisaaya Sedaxda gobal, si loo joojiyo waxyaabaha jira lana qaato aragti mid ah, heshiiskaas waxaan u gudbinay baarlamaanka Koonfur Galbeed, wuuna ansixiyay go’aanka aan qaadanay”

Dhanka kale Madoobe Nuunoow Maxamed ayeeynu wax ka weydiinay arinta ku aadan doorashada la sheegay in berri ay ka dhici doonto magaalada Baydhaba iyo sidoo kale qoraalkii madaxda dowladda Federaalka dhawaan ku amreen in la hakiyo shirka maamulka Sedaxda gobal ee Koonfur Galbeed.

“Doorashadaan iyo warqadaan lasoo diray anaga nama quseeyso, maamulkeena wuu dhisan yahay, dadkii loo soo diray ayaa laga rabaa fulinteeda, waxaana anaga diyaar u nahay in cid walba aan la hadalno”

Sidoo kale Mr Nuunoow ayaa sheegay in shacabka ku dhaqan gobalada Koonfur Galbeed ay soo dhaweeyeen in maamulkooda wada hadal uu la galo dowladda Soomaaliya, maamulka KMG ee Jubba iyo xubnahaan hadda wada dhismaha maamulka Koonfur Galbeed ee Sedaxda gobal.

“Shacabka Koonfur galbeed wey soo dhaweeyeen in la furo gogol oo dadka lala hadlo, la qanciyo, waxna loo sheego, halkii gacan ka hadlay ay dhici lahayd in dadka ay wada hadlaan wax ka wanaagsan malahan”

Maadaama uu sheegay in maamulka Jubba wada hadal uu la galaayo ayaan hadana waxaan wax ka weydiinay in ay jiraan xiriir ay la sameeyeen mas’uuliyiinta maamulkaasi.

“Maamulka KMG ee Jubba wey jiraan wada hadalo na dhex maray, waliba dad ku dhaw dhaw Axmed Madoobe, laakiinse weli war cad oo ku aadan xilliga wada hadalka aynu galeyno ma jirto” Madoobe ayaa sidaasi yiri.

Ugu dambeyn hogaamiyaha maamulka Lixda gobal ee Koonfur Galbeed ayaa ugu baaqay dowladda Soomaaliya in ay xaliso khilaafka dhexdeeda ah, si loo xaliyo arimaha kale ee ku saabsan maamulada.

Halkaan hoose ka dhageyso Wareysiga Madoobe Nuunoow Maxamed.

Goobjoog News