Dhageyso: Xubin Ka Tirsan Guddiga Doorashada Oo Uu Wasiir Dowladda Federaalka Ah Handaday
Haddii doorashada ka bacdi iyo inta doorashada lagu jiro ay wax isoo gaaraan, waxaa I dilay Maxamed Cali Xagaa
Fardowsa Maxamed Ducaale oo ka tirsan guddiga doorashooyinka dadban ee heer federaal ayaa Goobjoog News la soo xiriirtay iyaddoo ka cabaneysa in uu handadaad dil ah u geystay wasiiru dowlaha gaashaandhigga ee federaalka Soomaaliya Maxamed Cali Xagaa(Sawir).
Farduus waxaa ay Goobjoog u sheegtay“Haddii doorashada ka bacdi iyo inta doorashada lagu jiro ay wax isoo gaaraan, waxaa I dilay Maxamed Cali Xagaa”.
Hadaba wareysigan oo dheeraa, Waxaan ugu horeyn weydiiney cidda handadaada u geysatay gabadhan, waxaa ay ku jawaabtay:
“Waa siyaasiyiin qaranka Soomaaliyeed ka mid ah, waa wasiiru dowlaha gaashaadhigga Maxamed Cali Xagaa, ahna Xildhibaan Soomaaliyeed ahna guddoomiyaha guddiga isku dhafka ciidamada Soomaaliyeed”.
Fardowsa oo guddiga doorashada dadban u qaabilsan arrimaha Somaliland ayaan weydiiney sababta?
“Ma aha markii ugu horeysay ee uu ila dagaalo, guddiga markii aan soo galayey dagaal badan ayuu ila galay oo ah gabdhan ma aha qabiilka ay ku soo gashay, tii markii aan ka soo gudbey ee guddiga aan soo galay, doraad khamiistii waad ogeydeen Somaliland doorashadeeda dib u hakeeyeen oo arrimo siyaasadeed ay heysteen, siminaarkii anigoo ku jira oo qeyb ka mid ah ka hadlaya qoondada haweenka ayaa duhurkii la soo baxay, waa la dukaday, markii lagu noqdey oo guddoomiyaha guddiga federaalka ah uu imaanayey ee uu soo xirayey 2:30-kii ayuu isoo gaaray Maxamed Cali Xagaa, waxaa uu igu yiri haddii howlaha aad ku jirto aad ka bixi weydo, waad u dhiman doontaa, meeshaan Muqdisho ayaa la yiraahdaa”.
Ma Qoondada Haweenka ayaa laguugu Qoonsaday mise arrin kalaa jirta ayaan sidoo kale weydiiney:
“Meesha waxaa ka dhacay 3 oday oo ka mid ah beesha uu ka soo jeedo isku beel ayaan nahay ninkan, 3 odaybaa is qabsaday oo ah beeshuu ka soo jeedo iyo beeshaan ka soo jeedo, odoyaasha waxaa ay isku qabsadeen , waxaa ay isku qabsadeen waatii Jawaari uu saxiixay guddoomiyaha baarlamaanka federaalka uu sharciga hoos uga dhigayey oo aheyd qoladii heli karta 51-ka ay keensadaan, qolada kalana ay labada dhexdhexiisasan karaan 51-da, 3 oday oo beeshaan ah ayaa isku qabsaday, aniga iyo inan kale ayaa bannaanka usoo saarney, odoyaashii , waxaan isku deyney in aan dhexdhexaadino, waxaan u maleynayaa in arrintaas ay la xiriirto”
“Markii uu ii dhaaranayey, Xildhibaanno ayaa fadhiyay, Xildhibaan Zakariye iyo Xildhibaan Kaamil ayaa fadhiyay, labo odey oo Xildhibaannada la socdey ayaa fadhiyay, 4 qof oo marqaati ah ayaa heystaa”
Mar aan weyndiiney Cid kale oo Laamaha Amaanka, Madaxda qaranka iyo Guddiga aad ka tirsan tahay, Mala wadaagtay, waxaa ay tiri
“Waan u gudbiyay, laakin power abuse-ka la ii isticmaaley weli cid ka hadashay ma arag, waxaan kaloo codsanayaa CID-da, Nabadsugiida, beesha caalamka iyo bulshada rayidka ah in arrimaha dadka doorashada ku jira ee loo caga jugleynayo ee weliba dumarka ah ee power abuse-la ee.. waxaa la ii isticmaaley xeerka dastuurka ah 128 oo ah power abuse..in ay ka hadlaan laamaha ammaanka..in ay ja hadlaan’
“Waxaan ku wargelinayaa in ay arrintaas jirto, haddii doorashada ka bacdi iyo inta doorashada lagu jiro ay wax isoo gaaraan, waxaa I dilay Maxamed Cali Xagaa”
Shaqada makuu socotaa, Mise Cabsi ayaa ku gashay?
“Wallalow waxna ilaahbaa dila, waxna ilaahbaa nooleeya, qof power abuse isticmaalaya shaqadeyda uma joojinayo, qoranka Soomaaliyeed shaqada aan u hayo, marna ma ahi qof ka joogsaneyso.
Guddiga doorashada dadban ee heer federaal oo sidoo kale Goobjoog News la hadlay waxaa ay sheegeen in dhacdadaas Fardowsa Maxamed ku dhacday aaney horay uga warqabin oo warfaafinta ay ka maqleen, iyagoo intaa raaciyay in ay hadda baaritaan ku wadaan.
Dhinaca kale, Goobjoog News oo ilaalineysa xagga uu Wasiirka u leeyahay jawaab celin ayaa la hadashay wasiirka, innagoo weydiiney waxa uu uga jawaabayo eedeynta Fardowsa?
Maxamed Cali Xagaa, waxaa uu Goobjoog News u sheegay in aanu bixineyn wax jawaab ah
Dhageyso: