Dowladda Federaalka Ah Oo 10-Maalmood Qabsatay Soo Bandhigista Qorshe Howleedka Dib-u-eegista Dastuurka

Madaxweynaha Soomaaliya Maxamed Cabdullahi Farmaajo ayaa maanta ka qeybgalay shir looga hadlayo dib-u-eegista dastuurka, waxaa kale oo goobta joogay guddiyada dib-u-eegista dastuurka, guddoomiyeyaasha  iyo Xildhibaanno labada aqal.

Shirka markii uu soo dhammaaday waxaa saxaafadda la hadlay ra’isul wasaare ku xigeenka Soomaaliya Mahdi Maxamed Guuleed isaga oo sharaxaad ka bixiyay wixii shirka looga hadlay

Guuleed waxaa uu hadalkiisa ku bilaabay sharciyada halkaasi looga hadlay“ Waxaa lagaga hadlay arrimaha muhiimka ah ee dib-u-eegista dastuurka oo ay ka mid tahay in habka federaalka ah horay loo dhaqaajiyo, kala xadeynta awoodaha dowladda dhexe iyo dowlad goboleedyada, mideynta dastuurka ee dastuurka heer federaal iyo kuwa dowlad goboleedyada, nidaamka booliiska ee federaalka ah, nidaamka garsoorka ee federaalka ah, doorashooyinka hal qof iyo hal cod, dhameystirka shuruucda suuragelinaya doorasho xor ah sida sharciga nidaamka axsaabta, sharciga jinsiyadda, sharciga diiwaangelinta muwaadinka iyo sharciga diiwaangelinta codbixiyeyaasha”

Ra’isul Wasaare ku-xigeenka waxaa kale uu sheegay hirgelinta qodobada aasaasiga ah ee 133 iyo 134 iyo la la sameeyo heshiis siyaasi ah oo arrimahan marka la dhameeyo gundhig u noqon-doona, waxaa kale oo la isla afgartay in la sameeyo qaab ay u wada shaqeyn karaan wasaaradda dastuurka, guddiga madaxabannaan ee dib u eegista dastuurka, guddiga baarlamaanka ee la socodka howsha dib-u-eegista dastuurka, xafiiska madaxweynaha iyo xafiiska ra’isul wasaaraha.

Goobjoog News