Faah faahin: Dagaallo Xalay Ka Dhacay Shabellaha Hoose

Dagaal xooggan oo u dhaxeeyey ciidanka xoogga dalka iyo kuwa Al-shabaab ayaa xalay ka dhacay deegaanno ka tirsan gobolka Shabellaha Hoose.

Dagaalkan ayaa yimid kadib markii Al-shabaab weerar kusoo qaadeen saldhigyo ay ciidanka dowladda ku lahaayeen degmada Qoryooley, awdheegle, duleedka Afgooye iyo sidoo kale deegaanka Bariire ee gobolka Shabellaha Hoose.

Wararka ayaa waxay sheegayaan in dagaalkan xooggiisa uu ka dhacay degmada Qoryooley, waxayna Labada dhinac isku adeegsadeen hub aad u xooggan.

Dagaalkaasi ayaa la sheegayaa in ugu yaraan Saddex qof ay ku dhimatay, iyadoo dhaawacuna ku dhow yahay 10, sidey inoo sheegeen dadka deegaanka.

Sidoo kale, waxaa dagaalkan ku gubtay guryo iyo xarumo ganacsi oo dad shacab ah ay lahaayeen, iyadoo saakayna xaaladdu deggan tahay.

Taliska ciidanka xoogga dalka ee gobolka Shabellaha Hoose, weli wax faah faahin ah kama aanay bixin dagaalladan xalay dhacay.

Ururka Al-shabaab ayaa maalmahan dambe xoojiyey weerarada ay ku qaadayaan saldhigyada ay ciidanka DFS ku leeyihiin gobollada dalka qaarkood.

Warkaan wixii kusoo kordha kala soco wararkeena kale Insha Allah.

Goobjoog News