Fact Check: Madaxweyne Farmaajo Waa Mas’uul Kala Hadlo
Madaxweynaha J.F Soomaaliya Maxamed Cabdullahi Farmaajo ayaa khamiistii sheegay in aaney jirin dalal qani ah oo Soomaaliya u hagar baxay, isaga oo ka hadlayey shirkii golaha wasiirrada waxaa uu yiri “Arrinta ugu muhiimsan ee hadda laga Hadley oo qeyb ka ah arrimaha bulshada is-xilqaan, waa arrin aad iyo aad u muhiimsan, annagu dhaqaale ma heyno, dowladaha qaniga ah ee dhaqaalaha heysta noo hagar baxaayana ma heyno, oo leh dalkan waa burburay, een hadhow 30 sano, 20 sano wixii aad ka heli kartaan ama aad kala faa’ideysan kartaan hala gaaro, laakin hadda hala dhiso, ma heyno, sidaas darted innaga in aan isku tashanno weeye”.
Arrintan uu madaxweyne Farmaajo ka hadlay , waxaa ay ka soo horjeedaa natiijada safarro uu madaxweynuhu ku aaday dibadda, isaga oo dadka Soomaaliyeed rajo geliyey, sheegana inay dalal qani ah ay Soomaaliya ka fulin-doonaan mashaariic horumarineed.
Haddaba Goobjoog News Waxaa Ay Akhristayaasheeda Xusuusineysaa Inay Jiraan Dowlado Wax-qabtay Iyo Qaar uu Farmaajo Sheegay Inay Wax Qabanayaan:
February 23, 2017, Booqashada Farmaajo Ee Sacuudiga: Madaxweynaha Soomaaliya Maxamed Cabdullahi Farmaajo ayaa booqasho ku tagay dalka Sacuudiga kadib 16 maalmood doorashadiisa, isaga oo magaalada Riyaadh kula soo kulmay boqorka iyo mas’uuliyiin kale, shir jaraa’id uu Farmaajo ku qabtay Muqdisho markii uu soo laabtay, waxaa uu uga waramay waxyaabihii uu kala soo kulmay Sacuudiga.
Farmaajo waxaa uu sheegay in uu Sacuudiga kala hadlay xiriirka soo jireenka ah ee labada dal, duruufaha Soomaaliya heysta, abaaraha, cunaqabateynta xoolaha, dib u dhiska dalka, kabidda miisaaniyadda, waxaa ay Sacuudiga ballan-qaadeen sida uu sheegay in ay dhisayaan dhismayaasha dumay ee xafiisyada dowladda oo baarlamaanka ka mid yahay, dhismaha waddooyinka dalka isku xira iyo weliba Airporti cusub.
May 24, 2017: Madaxweyne Farmaajo iyo wafdigiisa ayaa booqday Qatar, isaga oo halkaasi kulamo kula yeeshay Amiirka dalkaasi Tamiim. Wafdiga Wasiirrada ah ee la socday madaxweynaha Jamhuuriyadda ayaa la kulmay dhiggooda Dalka Qatar, waxayna ka wada hadleen sidii iskaashi buuxa ay u yeelan lahaayeen Wasaaradaha ay kala matalaan ee Labada Waddan.
November 28, 2017: Iyaga oo laga amba-qaadayo safarkii Farmaajo uu Qatar ku tagay May, waxaa Muqdisho yimid wafdi ka socday Qatar, iyaga oo xukuumadda Soomaaliya ka saxiixday heshiis ku kacaya $200 Milyan oo mashaariic la saxiixatay dowladda federaalka ah, waxaa ugu mihiimsan dhimsha waddada Muqdisho-Afgooye 30 KM, Wadada Muqdisho-Jowhar 90 KM iyo xarumo kale oo dowladeed.
Dhinaca kale, July sanadkan, wasiir Axmed Cawad oo ka qeyb-galay wareegga 8-aad ee Madasha kulanka wasiirrada Shiinaha iyo Carabta ee loo yaqaanno “CASCF” ayaa sheegay in Shiinaha isku dayaayo soo celinta xiriirka Soomaaliya iyo Shiinaha ee dhinacyada Beeraha, Waraabka Korontada biyaha laga dhaliyo iyo Mashaariic kale oo horumarineed oo ay ka mid yihiin dib u dhiska theater-ka qaranka, Isbitaalka Banaadir iyo wadada isku xirta Muqdisho iyo Baydhabo.
Dalka Turkiga waa dalkii ugu horeeyey ay maal-geshi ku sameysay Soomaaliya burburkii kadib, tan iyo 2011-kii marka laga soo tago taageerada banii’aadnimo, Turkiga waxaa uu mashaariic ka fuliyey Soomaaliya sida: isbitaalka Digfeer, iskuulka tabobarka kalkaaliseyaasha, $70 malyuun oo ku baxday deeqo waxbarasho oo Soomaalida ah, Turkiga waxa uu caasimadda ka dhisey illaa 4 iskuul iyo 2 iskuul oo agoonta keliya ah, iskuulka tabobarka duulista hawada sare.
Mashaariicda Turkiga waxaa ka mid ah: Dhismaha waddooyinka Muqdisho oo ay ku baxday lacag la badan $43 malyuun oo doolar, walina hawsha ay sii socota, Shirkadda FAVORI LLC oo mashruuc $10 malyuun oo doolar ah kula wareegtay garoonka Aden Cadde iyo Al-Beyraak oo iyadana la wareegtay maamulista dekeda weyn ee Muqdisho, waxaa intaas dheer safaaradda weyn iyo duulimaadka tooska ah ee Turkish Airline iyo mashaariic kale.
Haddaba, dalalkaasi aan soo sheegay waa dalal qani ah, waana qeyb ka mid ah dalal badan oo uu mdaxweynuhu sheegay inay wax u qabteen ama u qaban-doonaan Soomaaliya, marka hadalkii khamiistii ee Farmaajo waxaa uu ahaa kala hadal!
Goobjoog News