Garoonka Diyaaradaha Aadan Cade ee magaalada Muqdisho oo Habeenkii shaqo bilaabaya
Dowladda Soomaaliya ayaa sheegtey in garoonka caalamiga ee dayuuradaha ee Aadan Cabdulle Cusmaan la qorsheynayo in laga shaqaysiiyo xiliga habeenkii ah , iyada oo uu garoonka hadda shaqeeyo maalinkii oo kaliya.
Wasiirka warfaafinta Mustafa Dhuxuloow oo maanta soo saaray war saxaafadeed uu kaga hadlayay waxqabadkii xukuumaddii usbuucii lasoo dhaafay ayaa sheegey in kulan 5tii bishan kusoo xirmey magaalada Nairobi kaasi oo dhexmaray wasaaradda duulista hawada sare iyo hey’adda maamulka hawada ee Qaramada Midoobey ay isku raaceen in gudddi ka kooban 4 xubnood Muqdisho loosoo diro bishan 11-keeda, kuwaasi oo leerar iyo qalab kale ku rakibi doona garoonka si uu habeenkii u shaqeeyo.
Garoonka ayaa markii hore shaqaynayay maalintii oo kaliya, waxaana tani ugu wacnaa sababo amni iyada oo horey ay u jirtey in gantaalo lagu soo weerari jirey garoonka iyo sidoo kale leerarkii dayuuradaha hagi lahaa oo uusan garoonka lahayn.
Leerarka waa kuwa laagu rakibayo dhabaha ay dayuuradaha ku ordaan si duuliyaha u arko halka uu yahay , waxaa kale oo lagu rakibayaa leerar baaloyaal ku xiran kuwaasi oo dayuuradaha meel dheer kasoo bidhaansadaan marka ay soo xaglo baxsanayaan.
Haddii ay noqoto in garoonka habeenkii shaqeeyo waxaa lagama maarmaan noqoneysa, tahayna in laga fikiro sidii loo heli lahaa tamar ama koronto 24 saac shaqaysa oo uu garoonka helo.
Waxaa kale oo wali taagan walwalka ku saabsan xagga amniga, iyada oo la kala xulanayo in dayuuradaha ay habeenkii dhoofaan mise ay soo dagaan kaliya.
Garoonka waxa uu ka mid yahay meelaha sida weyn loo illaaliyo, haddii uu habeenkii shaqeeyana waxa ay noqoneysaa in kor loo qaado foojignaanta iyo illaalada garoonka.
Garoonka dayuuradaha Aadan Cabdulle Cusmaan ayaa tan iyo markii dib loo furey waxaanan jirin wax dayuurado Transit ah ama dalal kale usii gudbayo oo garoonka isticmaala, mid ka mid ah sababaha arrinkaasi hortaagana waxaa lagu sheegey in garoonka uusan shaqaynin 24-ka saac, sidoo kalana uusan lahayn keyd shidaal oo ku filan in dayuuradaha sii gudbaya ay ka sahay qaataan.
Haddii dayuuradaha Transit-ka ay soo maraan Muqdisho waxa ay kordhineysaa dakhliga garoonka kasoo xaroodo.
Garoonka Aadan Cadde waxa uu marayay isbadalo is xigxigey, waxaana ugu muhiimsanaa in laga qaaday cunaqabatayntii caalamiga ahayd ee duulimaadyada, waxaa kale oo hadda socda dib u dhis balaaran oo lagu samaynayo garoonka.
Dhanka kale isla warbixinta uu maanta soo saaray wasiirka warfaafinta Soomaaliya Mustafe Dhuxuloow oo uu kaga hadlayay waxqabadka dowladda usbuucii lasoo dhaafay ayuu ku sheegey in illaa 80 garoomo dayuuradeed oo dalka ku yaala dayactir lagu samayn doono.
Wuxuu sheegey in siminaar dhawaan wasaarada duulista hawada sare ay kaga qeybgashay magaalada Nairobi, kaasi oo ay soo qabanqaabisey laanta maamulka hawada Soomaaliya ee Qaramada Midoobey UNSOA looga hadlay sidii loo dayactiri lahaa garoomada dayuuradaha Soomaaliya, xili xasilooni lagu soo dabaalay qeybo ka mid ah dalka, islamarkaasina ay kordheen dhaqdhaqaaqa gaadiidka hawada.
Wuxuu sheegey in wasiirka duulista hawada sare Siciid Jaamac Qoorsheel uu muujiyey muhiimadda ay dib u dhiska garoomada u leedahay shaqo u abuurista dhalinyarada Soomaaliyeed. Wuxuu sheegey in wasaaradda ay soo bandhigtey qiimeyn ay ku samaysay garoomadani.
Waxaa la saaray guddi ka kooban 11 xubnood oo ka kooban wasaaradda iyo hey’adda UNSOA kuwaasi oo isla dajin doono qorshaha dayactirka garoomada.
Wasiirka waxa uu sheegey in gobolo badan oo dalka aysan lahayn garoomo dayuuradeed, taasina ay ragaadineyso horumarkii ay gaari lahaayeen dadka goboladaasi.
Garoomada ayaa waxa ay muhiim u yihiin in gargaar la gaarsiiyo marka ay dhacaan masiibooyinka dabiiciga ah sida abaaraha, daadadka, iyo waliba cudurada.
Goobjoog News