Gudoomiyaha Cusub Ee Gobalka Banaadir Oo Maanta Si Rasmi Ah Xilka Ugala Wareegay Muungaab (Sawirro)

Gudoomiyaha cusub ee gobalka Banaadir ahna duqa magaalada Muqdisho Yuusuf Xuseen Jimcaale ayaa maanta si rasmi ah xilka ugala wareegay gudoomiyahii hore ee gobalka Xasan Maxamed Xuseen Muungaab, ka dib munaasabad ballaaran oo ka dhacday aqalka dowladda hoose ee magaalada Muqdisho.

Munaasabadaan waxaa ka qeybgalay Wasiirka arrimaha gudaha iyo federaalka Xukuumadda Soomaaliya C/raxmaan Maxamed Xuseen Odowaa, xubno kale oo ka mid ah golaha wasiirada, xildhibaanno ka tirsan baarlamaanka Soomaaliya, siyaasiyiin, Waxgarad, Gudoomiyeyaasha gobalka Banaadir, iyo qeybaha kala duwan ee Bulshada.

Gudoomiyahii hore ee gobalka Banaadir Mr Muungaab oo halkaasi hadal ka jeediyay ayaa ku dheeraaday ka hadal wixii uu qabtay mudadii uu shaqeynayay, isagoona waxyaabaha uu wareejinayay ay ku jirtay sida uu sheegay lacag dhan 200 kun oo doolarka Maraykan ah iyo Labo Bilyan oo shilin Soomaali ah.

Dhinaca kale gudoomiyaha cusub ee gobalka Banaadir oo isna halkaasi hadal ka jeediyay ayaa sheegay in maamulkiisa uu la imaan doono wax qabad muuqda, isbedallo badan iyo sidoo kale in il gaar ah uu ku hayn doono shacabka dhibban ee ku nool magaalada Muqdisho.

Wasiirka Arrimaha gudaha iyo Federaalka ee Xukuumadda Soomaaliya C/raxmaan Maxamed Xuseen Odowaa oo isna munaasabadii maanta hadal ka jeediyay ayaa ku amaanay Muungaab wax qabadka mudadii uu shaqeynayay ayna ka mid tahay dhismaha xarunta dowladda Hoose ee Muqdisho, sidoo kalena u rajeeyay maamulka cusub waxqabad ballaaran.