Human Rights Watch oo ciidanka AMISOM ku eedeysay kufsi

Ciidamada midowga Afrika ee AMISOM ayaa lagu eedeeyay in ay geysteen xad gudubyo ka dhan ah haweenka Soomaaliyeed, iyada oo AMISOM ay ka faa’ideysanaya daruufaha xaga bini´aadanimo iyo caawinaada ay u sameynayaan dadka danyarta isla markaana uga faa´iideysteen in ay kufsadaan haween Soomaaliyeed.

Warbixin ay soo saartay Hey’adda xuquuqul insaanka ee Human Rights Watch oo cinwaan looga dhigay “Sida ay Raggani nooga awood badan yihiin” ayaa waxaa lagu sheegay in wareysi ay hay´adda la yeelatay ilaa 21-dumar oo ay ku jiraan gabdho da’yar ah, kuwaas oo ciidamada AMISOM ay kufsadeen, isla markaana u geysteen tacadiyo tan iyo sanadkii 2013-dii.

Hey’adda Xuquuqul Insaanka Human Rights Watch ayaa warbixinteeda ku sheegtay in ciidamada ka kala socda Ugandha iyo Brundi ee ka howl gala xarumaha ay ku leeyihiin Muqdisho in falalkani tacadiyada dhanka galmada ah ay ka dhaceen, taasoo ay ku tilmaamtay hay´adda wax laga xumaado.
Warbixinta hay’adda HRW ayaa ku talinaysa in Midowga Afrika iyo AMISOM ay dhiiri geliyaan hab-dhaqan aan marnaba loogu dul-qaadan karin arimaha sharic darrada ah ee ka dhex dhaca gudaha saldhigyadooda.

AMISOM ayaa lagu eedeeyay in haween u soo raadsaday saldhigyada AMISOM kaalmo daawo ah iyo biyo la dhibaateeyay oo la kufsaday, sidoo kale waxaa lagu sheegay warbixinta in ay adeegsadaan mukhalisiin Soomaali ah oo ay isticmaalaan xeelado kala gedisan oo haweenka loogu soo xero geliyo, kadibna ay la galmoodaan.

Waxaa kaloo ay warbixinta ku talineysaa in midowga Afrika iyo AMISOM ay sameeyaan ama xoojiyaan guddiyo u xil saaran sida baaritaanka iyo edbinta oo wax ka qabto tacadiyada noocani ah iyo guddi baaritaan oo madax bannaan oo ah heerka ugu sareeya midowga Afrika.

Dhinaca kale, afhayeenka AMISOM Kornel Cali Aadan Xumad oo la hadlay laanta afka soomaaliga ee BBC-da ayaa beeniyay warbixintan, isaga oo ku tilmaamay in ay tahay mid aan waxba ka jirin oo saameyneysa dhamaan dalalka wakiilka ka ah midowga Afrika.Kornel Xumad ayaa sheegay in warbixintan aan wax su’aalo ah laga weydiin intii aan la soo saarin, taasna ay tahay wax aan la aqbali karin oo la doonayo in sumcada AMISOM wax loogu dhimo, isaga oo tilmaamay in AMISOM u taagan tahay horumarinta iyo nabadeynta Soomaaliya.

Si kastaba ha ahaatee warbixintan ka soo baxday Human Rights Watch ayaa ku soo beegmeysa, iyada oo ciidamada AMISOM ay bilaabeen howl gal loogu magac daray Badweynta Hindiya, kaas oo xarakada Al-Shabaab loogaga saaray deegaano dhowr ah.

 

Related Articles

17 Comments

Leave a Reply

Your email address will not be published. Required fields are marked *

Close
Goobjoog

FREE
VIEW