Kulan Looga Soo Horjeeday Guddiga Doorashada Oo Ka Dhacay Baladweyne

Magaalada Baladweyne ee xarunta gobolka Hiiraan waxaa maanta ka dhacay kulan ballaaran oo ay isugu yimaadeen Odayaal dhaqameed, waxgarad, siyaasiyiin, xildhibaanno hore iyo sidoo kale xubno matalayey bulshada B/weyne waxaana kulanka looga soo horjeeday guddiga doorashada heer Federaalk oo dhawaan uu magacaabay madaxweyne Xasan Sheekh Maxamuud.

Waxay sheegeen in reer Hiiraan aanay cidna ugu jirin 22-ka xubnood ee guddigan waxayna ay tilmaameen in siyaasad gaar ah uu arrintan ka leeyahay madaxweyne Xasan Sheekh Maxamuud waa sida ay hadalka u dhigeenne.

“Xasan Sheekh Maxamuud waa nin rabo inuu soo laabto oo duurka dad kasoo uruursanaayo, annaga waan kasoo horjeednaa 22-ka qofood ee lagu magacaabay guddiga doorashooyinka, haddii aynu nahay reer Hiiraan cidna naguma matasho guddigaasi, annaga waxaan rabnaa cidda na matali lahayd in Hiiraan ay kasoo baxdo, mana qaadan doonno guddigan mana qaadaneyno” sidaasi waxaa yiri mid ka mid ah siyaasiyiintii shirkaasi ka qeyb galay.

Sidoo kale mid ka mid ah waxgaradkii shirkaasi ka qeybgalay ayaa isna yiri “Maanta shirkaan aan isugu nimid waxa uu ku saabsan yahay qaadacaad, inaan ka hortagno beenta lasoo dhoob dhoobay lana rabo in la dhaqan geliyo, caalamka waxaan u sheegaynaa in dalka qatar ku sugan yahay dagaalna salka u saaran yahay, waxaana sababaya kooxda is magacawday oo aad soo dhisteen haddii aad tihiin caalamka”

Madaxweyne Xasan Sheekh Maxamuud ayaa dhawaan magacaabay 22 xubnood oo guddiga doorashada qaranka ah.

Goobjoog News