Wararka Caalamka

Kooxda Xuuthiyiinta dalka Yemen ayaa sheegtay in ay soo rideen diyaarad nooca aan duuliyaha lahayn ah oo Maraykanku ku leeyahay, taas oo dul maraysay hawada dalkaas, sida uu sheegay yahya Saree oo ah Afhayeenka milatariga ee Xuutiyiintu.

Ciidanka Booliska gobolka Kentucky ee dalka Mareykanka ayaa sheegay in hubeysan oo wali baxsad ah uu Sabtidi shalay ilaa 7 qof ku dhaawacay meel u dhaw waddada 75-ka ee marta gobollo badan oo Mareykanka ah.

Ciidamada maamulka Isra’il ayaa sii wada duqeymaha cirka ah ee ay ka wadaan Marinka Gaza, iyada oo dhanka kalana ay rabshado khasaaro sababay wali ka socdaan Daanta Galbeed ee dhulka la heysto ee Falastin.

Dabka ka kacay iskuulka Hillside Edarasha ee Nyeri, Kenya ayaa sababay dhimashada 17 arday

Masuuliyiinta dalka Venezuela ayaa xiray askari ka tirsan ciidamada badda Mareykanka oo ku socdaalayay dalalka Latin America, sida ay xaqiijiyeen saraakiisha wasaaradda Gaashandhigga Mareykanka ee Pentagon-ku.

Wararka ka imaanaya gobolka Georgia ee dalka Mareykanka ayaa sheegaya in wiil 14 sano jir ahi uu dilay labo arday oo ay isla dhiganayeen dugsiga halkaas ku yaalla iyo labo macalin, ayadoo sidoo kale rasaasta uu furay ay ku dhaawacmeen illaa sagaal qof oo goobtaasi ku sugnaa.

Ugu yaraan 47 qof ayaa ku dhintay, halka 206 kalena ay ku dhaawacmeen laba gantaal oo ciidamada Ruushku ay ku weerareen xarun militari oo ku taalla magaalada Poltava ee bartamaha Ukraine sida ay sheegeen mas’uuliyiinta dalkaasi

4 qof oo tareen saarnaa ayaa lagu toogtay magaalada Chicago ee dalka mareykanka, waxayna laamaha nabad-gelyadu sheegeen inay xabsiga u taxaabeen qof lagu tuhmayo inuu ka dambeeyay weerarkaas.

Dowladda Ingiriiska ayaa ku dhawaaqday inay hoos u dhigayso saanadda ciidan ee ay siiso ama ka iibiso maamulka Israa’iil, ayadoo sheegtay inay joojinayso 30 ka mid ah 350-ka shatiyada hubka ah ee ay u dhoofiyo Israa’iil, sababa la xariira halis ka dhalan karta iyo waxyaabaha shuruucda caalamiga ah iyo bini’aadantinimada ka baxsan ee loo adeegsado qalabkaas militari.

Booliska dalka Tuniisiya ayaa xiray siyaasi mucaarad ah oo caan ah, iyadoo la xaqiijiyay inuu ka mid ahaa laba qof oo doorashada kula loolami lahaa madaxweynaha hadda talada haya Kais Saied.