Ra’isulwasaare Cabdiwali Sheekh Axmed oo goor dhaweyd saxaafadda la hadlay ayaa markii ugu horeysey ka hadlay khilaafka u dhaxeeya isaga iyo madaxweynaha, wuxuuna madaxweynaha ku eedeeyey mooshinka codka kalsoonida loogu qaadayo isaga ee baarlamaanka yaala.
Wuxuu Ra’isulwasaaraha sheegey in 25 kii bishii October, 2014 in uu soo saaray wareegto isku shaandheyn uu ku sameeyey golaha wasiirada isaga oo tixraacayo qodobka boqolaad ee dastuurka ee awoodda siinaya Ra’isulwasaaraha, xarfaha A iyo B.
Wuxuu sheegey in ujeedka isku shaandheynta ay ahayd dardar galinta shaqada xukuumada, gaar ahaan in la xaliyo muran soo kala dhexgalay wasaaradda caddaalada iyo garsoorka, iyo sidoo kale cabashooyin laga keeney wasaaradda arrimaha dibada iyo maaliyadda.
Balse wuxuu sheegey in nasiib daro madaxweynaha uu isla maalintaasi soo saaray war qoraal ah oo uu ku diidey isku shaandheynta, wasiiradii ay quseysey amar ku siiyey in aysan u hogaansamin shaqadoodii hore sii wataan “Waxaa cad in go’aankaasi madaxweynaha uu si cad oga hor imaanayay dastuurka, gaar ahaan qodobkaasi aan horey u xusey, iyo kala madax banaanaanta hey’adaha dastuuriga ah ee dalkas” ayuu yiri Cabdiwali oo si furan u hadlayay.
Wuxuu sheegey in inbadan la’isku dayay in xal laga gaaro khilaafka, gaar ahaan xildhibaanada iyo beesha caalamka , balse uu madaxweynaha dhagaha ka fureystey.
Wuxuu madaxweytooyada ku eedeeyey in uu soo abaabuley mooshinka ka dhanka ah isaga ee baarlamaanka yaala , kaasi oo uu ku tilmaamay sharci daro, islamarkaasina aanan quseynin waxqabadka xukuumadda, balse ku salaysanyahay wasiir saaxiib la ah madaxweynaha oo wasaarad kale loo wareejiyey.
“Mooshinkaasi oo xildhibaano badan iyo bulshada inteeda badan u aqoonsanyihiin in uu sharci daro yahay, loona adeegsaday musuq maasuq, wuxuu keeney kala qeybsanaan balaaran oo golaha dhexdiisa iyo hey’adaha kale ee dalka” ayuu yiri Cabdiwali.
Wuxuu intaasi ku daray in mooshinka uu caqabad ku noqdey geedisocodka hiigsiga sanadka 2016-ka.
“ Waxaan bogaadinayaa xubnaha golaha baarlamaanka ee ka hortagay isku daygii maanta lagu afgambin lahaa xukuumadda” ayuu yiri Ra’isulwasaaraha.
Wuxuu ugu dambeyntii sheegey in uu isaga diyaar u yahay in wadahadal lagu dhameeyo.
Dhageyso
GoobjoogNews
