Safaaradda Iran ee Soomaaliya: Waxaan ogeyn in La Diiday Christmas lakin ma ogeyn in Mowliidka Nabiga la mamnuucay”

Safiir ku xigeenka Iran ee Soomaaliya Javad Dehghan Latfabadi oo wareysi gaar ah  siiyay Goobjoog News ayaa weeraray dad uu ugu yeeray gacan sedexaad ama dal sedexaad  in ay ka shaqeynayaan isku dhaca Soomaaliya iyo Iran.

Safiirka ayaa ugu horeyn sheegay in maanta ay hay’adda samafalka ay Imaam Khumeyni muqdisho ku qabatay xaflad lagu xusayo dhalashada Nabi Muxamed iyo haddiyo lagu gudoon siin lahaa Lamaane is aroosay, ardey iyo Ciyaartoy ka tirsan kooxaha heerka koobaad.

Safiirka oo ka jawaabayey su’aal ahyed dadkan haddiyadaha la siinayo yaa soo xulay waxaa uu sheegay in dadka Lamaanaha ah ay la siin lahaa qalabka guriga ay u soo gudbiyeen magacuyadooda  Wasaaradaha Shaqada iyo Shaqaalaha iyo wasaaradda dhalinyarada iyo Sportiga iyo Baarlamaanka Soomaaliya.

Dadkan ayaa sida uu Safiirka sheegay waxaa ay ka koobnaayeen 15 Caruus, 15 ardey, 10 qof oo bartay Harqaanka iyo 5 ciyaartooy oo Kabtan ka ah kooxaha xeerka koobaad ee Soomaaliya.

Safiirka waxaa uu intaa raaciyay in tusaale ahaan dadka arooska oo gaaraya ilaa 15 qof, waxaa la siin lahaa midkiiba $200 oo Cash ah iyo Alaab u dhiganta $358, halka ardeyda la siin lahaa qalab waxbarasho iyo Ciyaartoyda oo la siin lahaa Kubao iyo Mid $200.

Safiirka oo ka jawaabayey yaa dowladda Soomaaliya ka socday oo xafladda joogay waxaa uu sheegay in xafladda ay joogeen Cusmaan Libaax Ibraahim oo ah Wasiir ku xigeenka Wasaaradda Shaqada iyo Shaqaalaha iyo Maxamed Cumar Dhalxa oo ah Xildhibaan ka tirsan Baarlamaanka Soomaaliya.

Safiirka oo sidoo kale ka jawaabayey waxa dhacay, waxaa uu sharaxay in ciidamada amaanka ay soo galeen xafladda oo socota iyagoo ku amray dadkii Hoolka joogay in ay kala tagaan, Wasiirka iyo Xildhibaanka ayaa isku dayey in ay la hadlaan lakin hay’adaha amaanka waxaa ay ku adkeysteen in dadka baxaan.

Safiirka oo codkiisa xanaaq ka muuqato ayaa sheegay in hay’adaha amaanka ay garaaceen darawalkiisa isla markaana ay xireen mid shaqaalihiisa ka tirsan, waxaa la iigula taliyay in aay nafteyda la baxo ayuu intaa raaciyay.

Hay’adaha amaanka ayaa u sheegay in lagu soo wargeliyay in xafladdan ay qabaneyso Safaaradda Iran lakin aanay heysan ogolaashiyo hay’adaha amaanka ah, arrintaas uu iska fogeeyay Safiirka, isagoo sheegay in xafladda ay wadday bilow ilaa dhamaan hay’adda Imaam Khumeyni.

Safiirka ayaa wareysigan oo siiyay Goobjoog News uga hadlay hay’adda Imaam Khumeyni, waxaa uu sheegay in hay’addan la aasaasy towraddii Iran kadib, ilaa 4 Milyan ayey ku caawisaa gudaha Iran, waxaa kaloo ay xafiisyo ku leedahay dalal badan oo Caalamka, waxaa ay ka shaqeysaa arrimo badan sida Caafimaadka, Waxbarashada, Cunto qeybinta iyo xitaa shaqo siinta.

Waxaa uu sidoo kale sheegay in hay’addan ay joogtay Soomaaliya 3-dii sano ee ugu dambeysay isla markaana ay caawisay dad badan isagoo carabka ku adkeeyay in aanay shaqo ku laheyn Siyaasad iyo wax ku saabsan diin.

Safaaradda Iran ayaa caddeysan in aanay jirin wax shiiceyn ah isla markaana aanay waligood shiiceyn qof Soomaali ah.

Safiirka ayaa amaanay xiriirka Taariikhiga ah ee labada dal ee Soomaaliya iyo Iran isagoo sheegay in ay ay jirto dal sedexaad oo doonaya in labada shacab isku xudaan, Safiirka waxaa uu ka gaabsaday Magaca dalka uu ula jeedo.

Ugu dambeyn waxaa uu Safiirka sheegay in uu dalkiisa gaarsiiyay wixii maanta dhacay, isagoo sidoo kale la hadlay saraakiisha u sareysa dowladda Soomaaliya”waan baareynaa ayey igu dhaheen ayuu hadalkiisa kusoo gabagabeeyay”.