Shirkii Jowhar ee Maamulka Hiiraan iyo Shabeellada dhexe yaa meel ku sheega?
Shirkii maamul u sameynta gobollada Jowhar iyo Shabeellada dhexe ee January 12-keeda ka furmay magaalada Jowhar ayaa la waayey hadal-heyntiisa iyo meel uu ku dambeeyay, beelihii waa kala tageen, dowladdii meesha ma joogto, hool-kii shirka isagoo cidlo ah ayaa waardiye laga hayaa…..Haddaba shirkaas yaa meel ku sheega?!
Xilligan Jowhar uma muuqato magaalo uu shir ka socdo, beelihii meelaha fog fog ka yimid waxaa ay dib ula noqdeen ergadoodii halka beelihii gobolka deganaa ay bilaabeen nolol maalmeedkii caadiga ahaa, beero , xoolo dhaqasho iyo ganacsi.
Shirka Jowhar waxaa lagu kala tagay markii uu ku dhawaaqay wasiirka arrimaha gudaha iyo federaalka guddiga farsamo ee shirka maamul u sameynta Hiiraan iyo Shabeellada dhexe.
Guddigan ayaa beelaha wax loogu qeybiyay sidan: Abgaal 15-XUBIN, Xawaadle: 11 XUBIN, Gaaljecel: 6 XUBIN, Gugundhabe: 6 XUBIN, Jareerweyne: 6 XUBIN, Habargidir: 5 XUBIN, Ujeejeen: 2 XUBIN, Moobleen: 2 XUBIN
Beelaha ayaa dhaliilay xubnaha laga siiyay guddigan farsamo, taasi oo keentay in beel waliba ay ergadeedii dib ula laabato, shirkiina uu sidaa ku burburo, iyadoo mid weliba ku doodeyso in xaqeeda la duudsiiyey.
Labadan gobol waxaa wada dega beelo aad u badan, beelo waaweyn iyo beelo yar yar, in si cadaalad ah wax loogu qeybiyo waa arrin adag, beel weliba waxaa ay dooneysaa in loo yeelo sida ay iyada rabto.
Khilaaf badan ayaa hareeyay shirka, xalkana waxaa uu noqday mid adag, dowladda waxaa ay ka gaabsatay arrimaha shirka, xitaa booqashada khamiistii uu madaxweyne Xasan Sheekh ku tagay Baledweyn waxaa ay ku soo dhamaatay natiijo la’aan isagoo la kulmay oo keliya Ugaas Xasan Ugaas Khalif kadibna Xamar dib ugu soo laabtay.
Maxay Doonayaan Dadka reer Hiiraan iyo Shabeelada dhexe?
Shacabka ku nool labada gobol ee Hiiraan iyo Shabeelada dhexe , waxaa ay doonayaan in loo madax-baneeyo arrimaha shirka oo dhan, sida uu u socda, xulista ergada, geedi socodka iyo xitaa natiijada shirka.
Shir ay khamiistii yeesheen Odoyaasha iyo Siyaasiyiinta Shabeelada dhexe waxaa ay soo saareen qodobo ay ka mid yihiin: si uu shirka u sii socda waa in wax lagu saleeyo Cadaalad iyo Sinnaan.
Odoyaasha iyo Siyaasiyiinta Hiiraan waxaa ay wataan cabashooyin sida: in madaxweynaha uu ballamo uga baxay, in gogosha Baledweyne lagu celiyo, laakiin taladooda ugu weyn waa in dadka labada gobol deggen loo madax baneeyo aayaha shirka iyo dhamaan geedi socodka iyagoo ku adkeysanaya in dowladdana ay ku ekaato fududeyn oo keliya, arrintaas oo sida muuqata ku adkaatay dowladda federaalka ah.
Saameynta Shirka Jowhar:
Shirka Jowhar isagoo aan socon ayuu soo jiiday dhibaatooyin badan:
Jowhar: Magaalada Jowhar waxaa weli adag isu socodka gaadiidka iyo dadweynaha, waxaa xiran dhammaan waddooyinka gala ama ka soo baxa hoolka shirka.
Buulomakiino oo ah xaafadda dhanka bari ka xigta hoolka shirka waa laga qaxay, dadka deegaanka ayaa ka cabsi qaba in la soo weeraro ciidamada AMISOM ee waardiyaha ka ah hoolka Shira.
Weli waxaa xiran Iskuullada Xasan Barsane iyo Imaamu Shaafici, ardeydii labadaas iskuul waxaa loo qeybiyay Iskuulaad kale maadaama ay ka agdhow yihiin hoolka shirka, waxaa ay arrinkaas ku qabaan dhibaato badan.
Hiiraan: Baledweyn waxaa ku sugan Wasiiro iyo Xildhibaano, dadkan oo shirar aan kala go’ laheyn ku jira waxaa ay cabashooda gaarsiiyeen in xitaa laga soo raro shirka Jowhar.
La tashi la’aanta dowladda ee shacabka labada gobol dega ,waxaa ay keentay in meesha ay ka baxdo kalsoonidii lagu qabay hay’adaha dowladda.
Hakadka uu galay shirka waxaa ay meesha ka saartay ballan-qaadyo badan oo dowladda ay sameysay, dowladda waxaa ay furitaankii shirka ballan-qaaday in ay rajeynayaan in dadka gobolladaas degan ay madaxweyne ku yeeshaan shirka lagu qabanayo Istanbul February 20-keeda, kaas oo looga tashanayo geedi socodka Soomaaliya, labadaas gobol waxaa ay ka dhaceen tareenka oo shirka waxaa u mateli doono guddoomiyeyaasha labada gobol.
Muhiimadda waa Natiijada:
Dowladda waxaa ay dadaal ugu jirtaa in shirkaas uu Jowhar ka dhaco, beelahana ay dib ugu soo noqdaan, iyadoo xoogga saareysa in wax natiijo ah ka soo baxaan, sidaana lagu soo gabagabeeyo dhismaha maamul goboleedyada federaalka ah ee dalka.
Waxaa muuqata in dhibaato badan uu shirkan madaxa la galay, dowladda waxaa ay xoogga saartay in natiijo uun laga gaaro shirka maamul u sameynta Hiiraan iyo Shabeelada dhexe halka beel weliba ay dooneyso in iyadu ay natiijada noqoto!
Haddaba su’aasha waxaa ay tahay Yaa meel ku sheega? Waa su’aal ku adag dhegaha dadka ay khuseyso laakiin in la isweydiiyo waxaan u arkay muhiim.
Sooyaalka Shirka Maamul u sameynta Hiiraan iyo Shabeelada Dhexe
August 6, 2015: Goobjoog News ayaa heshay Jadwalka Shirka Hiiraan iyo Shabeelle, Wasaaradda arrimaha gudaha ayaa soo saartay, qaabka uu u soconayo shirka ilaa laga dooranayo Madaxweyne uu maamulkaas yeesho.
October 30, 2015: Wareegto kasoo baxday xafiiska wasiirka arrimaha gudaha iyo federaalka Soomaaliya ayaa lagu magacaabay guddiga farsamada maamul u sameynta gobollada Hiiraan iyo Shabeellada Dhexe.
Xubnaha la magacaabay oo ka kooban 14-xubin ayaa waxaa ku jira laba haween, halka inta kalena ay rag yihiin, iyadoo la sheegay inay guddigaan go’aano rasmi ah gaari doonaan, aysanna ka mid noqon doonin baa la yiri xildhibaannada maamulkaas ee la soo xulayo.
December 20, 2015: Madaxweynaha dowladda Federaalka Soomaaliya Xasan Sheekh Maxamuud ayaa wareegto ku magacaabay caasimadda maamulka loo sameynayo Shabellaha Dhexe Iyo Hiiraan, sidoo kalena sheegay halka maamulkaasi caasimadda u noqoneyso.
Wareegtada ayaa lagu sheegay markii madaxweynaha arrintaasi wadatashiyo badan ka sameeyay in shirka lagu qaban doono magaalada Jowhar, caasimaddana ay noqon doonto degmada Buuloburde, shirka maamul u sameynta uu ka dhacayo Jowhar.
January 12, 2016: Madaxweynaha Soomaaliya Xasan Sheekh Maxamuud ayaa si rasmi ah waxaa uu uga furay magaalada Jowhar ee xarunta Gobolka Shabeellaha Dhexe shirka maamul dhisidda Hiiraan iyo Shabeellaha Dhexe, iyadoo ay ka soo qeyb galeen boqolaal ergo oo labada gobol ka socotay.
January 19, 2016: Wasiirka arrimaha gudaha ee dalka ayaa ku dhawaaqay guddi farsamo shirka maamul u sameynta Hiiraan iyo Shabeellada dhexe, kaas oo beelaha ay ka soo horjeesteen.
W/D: Abdi Aziz Ahmed Gurbiye.
Goobjoog News