USAID oo Maalgelineysa Mashaariic Lagu Hormarinayo Dhalinyarada
Waxaa maanta xarunta Xalane magaalada Muqdisho lagu qabtay kulan u jeedkiisu ahaa soo bandhigidda maalgashiga dhalinyarada Soomaaliyeed, waxaana lacag ku bixisay hey’adda USAID.
Kulanka ayaa waxaana ka soo qeyb galay mas’uuliyiin ka socda DF, wakiilka dowladda Maraykanka Donald Yamamoto, hey’addo kale, qeybaha kala duwan ee bulshada iyo xubno ka socday shirkadda Geel ayaa ayadu soo agaasintay.
Dhallinyarada ka faa’iideysanaya Barnaamijkaan ayaa ka yimid dhammaan gobollada dalka, waxaana tiradoodu tahay ilaa 340 dhalinyao waxaana hal abuurrada ganacsi ee loo maalgalinayo kamid ah Beeraha, kalluumeysiga, Tamarta iyo Tiknoolojiyadda.
Ugu horeyn waxaa meesha ka hadlay Axmed Cabdi Nuur oo ah mas’uul ka tirsan hey’adda Geel isaga oo faah faahiyey ujeedka laga lahaa bandhigga maalgashiga dhalinyarada Soomaaliyeed in qaarkood ay wax soo saaraan kuwana ay iibsadaan waxaana uu yir.
“Maanta waxaa sharaf inoo ah inaan aragno xoogaa wax soo saarkeenna iyo adeegyo ay leeyihiin dhallinyarada Soomaaliyeed, waana fursad weyn inaan aragno in alaabahaas qeybo ka mid ah ay iibsanayaan dhallinyada Soomaaliyeed taasoo loo dhexmarinayo suuqa”.
Sidoo kale waxaa bandhigga ka hadlay wakiilka dowladda Mareykana u fadhiya Soomaaliya Donald Yamamoto, isaga oo aad ugu dheeraaday taageerada ay dowladda Mareykanka ay dowladda Soomaaliya iyo in hadda ay diyaar u yihiin in $1.6 Milion ay ku bixyaan taageerada dhalinyarada Soomaaliyeed hibada leh hibada wax soo saar.
“Soomaaliya waxaa qabsaday dagaallo ahli ah oo burburiyey dhammaan ilihii dhaqaalaha, hey’addihii dowladda iyo fursado badan oo dhalinyaradu ay ku naaloon laheyd, Sida aan ognahay Soomaaliya 70% waa dad dhalin yaro ah dhalinyaradaas waxaa ay u baahan yihiin in ay helaan fursado ay mustaqbalkooda ay ku hagaajiyaan iyo jiilalka kale ee soo socda mustaqbalka soo aadan” ayuu yiri Yamamato.
Donald Yamamoto oo hadalkiisa siiwato ayaa carabka ku dhuftay in dowladdiisa ay diyaar u tahay in ay gacan qabato dhalinyarada Soomaaliyeed waxuuna yiri
” Mareykanka waxaa ay diyaar u tahay in ay ka caawiso Bulshada Soomaaliyeed sidii dhalinyaradaas oo ladhabarka u ah bulshada loo hagaajin lahaa fursadaha iyo hal abuurka ay u baahan yihiin sidii loo garab qaban lahaa ayaan ka shaqeyneynaa oo aan diyaar u nahay”
Ugu dambeyn Shirkadda Geel ayaa waxaa ay ka mid tahay shirkada ka jira afrika gaar ahaan Soomaaliya waxaana ay ka shaqeysaa in ay soo bandhigto wax soo saarka dalka iyo dadka leh hibooyinka ganacsi ee guuleystay.
Goobjoog News