Wasaaradaha Galmudug Oo Weli Helin Xafiisyo Rasmi Ah Oo Ay Ku Shaqeeyaan

Tan iyo markii la dhisay maamulka Galmudug ee uu hogaamiyo Madaxweyne Cabdikariin Xuseen Guuleed ayaa la sheegayaa in aanu jirin xafiis si rasmi ah ay u furteen wasaaradaha maamulkaasi, balse markaan ay wadaan qorsheyaal ay xafiisyo iyo xarumo rasmi ah ay ku dhisanayaan.

Wasaaradda Arimaha gudaha iyo dowladaha hoose ee Galmudug ayaa sheegay in ay ku howlanyihiin sidii ay u furan lahaayeen xafiis ay wasaaraddu leedahay.

Wasiiru dowlaha arrimaha gudaha iyo dowladaha hoose ee Galmudug Cumar Maxamed Diiriye oo la hadlay Goobjoog News ayaa sheegay in wasaaraddu ay waddo dadaallo Todobaadkaan ay magaalada Cadaado kaga furaneyso xafiis bulshada loogu shaqeeyo maadaama horay uusan u jirin sida uu sheegay xafiis si rasmiya u shaqeeya ee howl wadeennada wasaaraddu ay ku shaqeeyaan, waxana uu intaa hadalkiisa raaciyay inay muhiim tahay dhammaan wasaaradaha Galmudug in ay helaan xafiisyo ay ku shaqeeyaan si bulshada galmudug ay u helaan adeegga dowliga ah oo ay u baahanyihiin.

Waxa Uu tilmaamay Cumar Guureeye in horumar kasta oo bulsho gaarto uu ku xiranyahay amni iyo is aaminaad isagoo bulshada Galmudug ugu baaqay in ay hubka dhigaan oo ay horumarka usoo jeestaan.

Hadalkani ayaa imaanaya xilli aysan haatan jirin wasaarad ku shaqeeysa xafiis ay leedahay oo ka tirsan xukuumadda madaxweyne C/kariin Xuseen Guuleed taas oo qeyb ka ah gaabiska howlaha shaqo wasaaradaha kala duwan ee maamulka Galmudug.

Goobjoog News