Wasaaradda Qorsheynta Maamulka Koonfur Galbeed Oo Loo Dhisayo Xarun Ay Ku Shaqeyso

Munaasabad lagu dhegax dhigayey xarun cusub oo ay ku shaqeyn doonto wasaaradda qorsheynta maamulka Koonfur Galbeed ayaa lagu qabtay magaalada Bahadba ee xarunta gobolka Baay, iyadoo munaasabadani ay ka qeybgaleen mas’uuliyiin uu ka mid yahay guddoomiyaha Baarlamaanka maamulka Koonfur Galbeed.

Wasiirka wasaaradda qorsheynta maamulka Koonfur Galbeed Cabdinaasir Nuur Caruus oo halkaasi warbaahinta kula hadlay ayaa sheegay in wasaaraddiisa ay caawinaad ka heshay hay’dda UNDP oo bixin doonta qarashka ku baxaya dhismahani.

Waxa uu tilmaamay wasiirka in wasaaradda loo dhisayo xafiisyo, hool shirarka ah iyo Masjid, islamarkaana ay ku bixi doonto lacag dhan 182 kun oo doolarka Maraykanka ah oo ay bixineyso UNDP.

Dhinaca kale guddoomiyaha baarlamaanka maamulka Koonfur Galbeed C/qaadir Shariif Sheekhunaa Maye oo la hadlay warbaahinta ayaa soo dhaweeyay qorshaan lagu dhisayo xaruntan cusub, waxaana uu tilmaamay in xilligaan maamulka Koonfur Galbeed sameynayo horumaro badan.

Inta badan wasaaradaha maamulka Koonfur Galbeed ayaan lahayn xarumo ay ku shaqeeyaan, qaarkood waa loo dhisay, kuwo hadda ayeey socdaan halka kuwo kalena la sugayo maalgelintooda.

Goobjoog News