Wasiir Maareeye Oo Sheegay Inay Meel Wanaagsan Marayaan Wadahadallada Ganacstada G/banaadir Iyo DFS

Wasiirka Wasaaradda Ganacsiga ee xukuumadda Federaalka Soomaaliya Maxamed Cabdi Xayir Maareeye oo la hadlay Goobjoog News, ayaa sheegay in meel wanaagsan uu marayo wadahadalka dowladda Federaalka iyo ganacsatada gobolka Banaadir oo ka cabanaya canshuur dheeraad ah oo ay sheegeen in laga qaadayo.

Waxa uu sheegay wasiir Maareeye in canshuurta laga dalbaday ganacsatada ay tahay mid aad u jaban, isla markaana marka kuwa caalamka loo eego ay aad uga yar tahay.

Waxa uu tilmaamay Maareeye in ganacsatada ay is arkeen, haatanna wadahadalladooda meelihii ugu dambeeyay marayo.

“Wasaaradda maaliyadda iyo ganacsatada waan dhex soconnay, annaga oo ku dedaaleynay in ganacsatada Soomaaliyeed ay qancaan, wax dhib ku ah aan lagu soo rogin, wax faa’idadooda baabi’inaya aan lagu soo rogin, runtii ganacsatada qeybahoda kala duwan madaxdooda iyo rugta ganacsiga waanu isla akhrinnay waxa ay soo rogtay wasaaradda maaliyadda.”

“Waa wax aad iyo aad u yar oo la qaadi karo, waad og tahay marka Koobka shaaha la cabbayo waxaa canshuur laga qaadaa %30 VAT, laakiin halkaan waa %5, dadka qaarkii baa yiraahda waxaan waxba ma tarayee kusoo dara, dadka bannaanka ka yimid ee adduunka sida wax loo canshuuro arka waxay leeyihiin waxba ma tarayee ku darsada, marka waa wax waxaasi kasii yar, laakiinse waxaad mooddaa in ganacsatada Bakaare oo kale wax aan jirin oo been ah loo sheegay, oo la yiri dowladda canshuurtii hore ka badan ayey idin ku soo rogtay, ganacsatada Soomaaliyeed waxaan leennahay waxaasi ma jiraan, kaalaya oo firiya, waa lagu tusayaa, wixii dhib ah oo dhanna waa lagaa deynayaa, marka meelihii ugu dambeeyay ayey mareysaa” ayuu yiri Wasiirku.

Ganacsatada Gobolka Banaadir ayaa diiddan inay bixiyaan canshuurta gadista oo loo sheegay in looga dhex qaadi doono dekadda magaalada Muqdisho.

Goobjoog News