Xildhibaan Saadiq Abshir Garaad oo ka tirsan baarlamaanka Dowlad Goboleedka Puntland oo wareysi gaar ah siiyay Goobjoog News ayaa sheegay inaan baarlamaanka federaalku xaq u lahayn iney wax ka bedel ku sameeyaan qodob dastuuri ah aqalka sare la’aantii.
Xildhibaanka oo aan ka wareysanay war-saxaafadeed ka soo baxay Puntland oo looga soo horjeedo dib u eegista uu baarlamaanka federaalku uu ku sameynayo hanaanka doorasho ee 2016 ayaa hadalkisa ku bilaabay:
“Barnaamijka doorashda ee 2016 waxa uu ahaa mid madal wadatashi Qaran lagu sameeyay, wakhti bandanna laga soo shaqeeyay, markii dowaldda federaalka ahi sanadkii hore dhax bartankiisa ay go’aamisay in doorashooyinkii Dastuurku jideeynayay oo waajib ku ahaa inaaney qaban Karin, madal qaran baa la dhisay, madasha qaranka waxaa ku jiray dhamaan hay’adaha dowladda federaalka oo dhameystiran, haday tahay baarlamaanka, madaxweynaha iyo golaha xukuumadda iyo dowaldaha xubinta ka ah dowladda Federaalka Soomaaliya”.
“Wakhti badan baa la qaatay, dood badan baa ka dhacday, shirar badan ayay yeesheen, is afgaranwaa fara badan  ayaa dhacay, aakhirkii waxbaa la isku afgartay, cid ka dhinneyd oo la leeyahay bal ra’yigooda ha ku darsato ma aysan jirin, sidaas ayaana la isku afgartay” ayuu hadalkiisa sii raaciyay.
Waxa uu xildhibaanku sheegay in baarlamaanku taageerid oo kaliya uu heshiiska ku lahaa laakiin aanuu xaq u lahayn inuu dib u eegsi ku sameeyo:
“Heshiiskii ugu dambeeyay ee bishii 4aad Xamar kasoo baxay oo shaxda doorashada iyo nidaamka doorashada lagu gaareyna baarlamaanku waxa uu ku lahaa qodob iney ayidaan, taa macneheedu ma ahayn in uu yahay baarlamaanku hay’ad u harsaneyd oo xaq u lahayd iney dib u eegis ku sameyso oo wax ka bedesho waxna ku darto, wakiiladooduna way fadhiyeen go’aanada madasha laga soo saareyna guddoomiyahooda oo baarlamaanka federaalka ku fadhiya ayaa wax ka soo saarayay”.
Waxa uu xidhibaanku hoosta ka xariiqay in baarlamaanku uu qeyb ka ahaa heshiiskii madasha guddoomiyaha baarlamaanka federaalkuna uu u matalayay xubnaha:
“Guddi baa loo saarayaa iyo waxbaa laga badalayaa, waxay aniga ila tahay waa wakhti dil un baan u arka, waayo, wax loo dhan yahay ayay ahayd baarlamaankuna ay taladooda iyo gudiyadooda ay ku lahaayeen, illaa guddoomiyahoodu qaraanrka wax kasoo saaray, madaxweynaha oo go’aanka baarlamaanka marka ugu dambeysa saxiixi lahaana isaguna go’aanka ayuu qeyb ka ahaa, markaa maba fahmin waxa ka socda meesha”.
“Fashil iyaga ka yimid iyo mas’uuliyadoodii oo ay gabeen xal lala xallinayay iyo go’aamo siyaasadeed oo lala gaaray weeyaan waxa meesha yaallaa’e, dastuurka ma waafaqsan tahay ma waafaqsana meeshaba ma taallo, waayo dastuurkii iyagaa tuuray oo yiri shaqadii dastuuriga ahayd ma qaban karno, dastuurka haddii la aado waa in doorasho cod iyo qof ah la qaadaa” waana sida uu xildhibaanku hadalkiisa u dhigay.
Waxa uu sheegay, in haddii ay wax ka bedelaan iyagu fashilka ay sameeyaan ay dusha u ridanayaan, wakhtiguna wuu dhamaanayaa doorasho qof iyo cod waxaan ahayna lama gaarayo.
Xildhibaanku waxa uu si cad uga hadlay in baarlamaanka federaalku aanuu waxba ka bedeli Karin dastuurka isagoo qodob Dastuuri ah Soo qaatay:
“Dastuurka iyagu ma waafajin karaan waxna kama bedeli karaan, habraaca dastuurka federaalka wax looga bedeli karo waa in labada aqal ee baarlamaanku jiraan, hal qodob dastuuka hadda jira baalamaanku kuma kordhin karo kamana dhimi karo, markaa awoodoodaba maaha in ay dastuurka wax waafajiyaan, haddii 275 xildhibaan ay gacanta taagaan dastuurka waxba kama bedeli karaan sidaasna waxaa qaba dastuurka qodobka 60aad”.
Ugu dambeyn, dowadda goboleedka Puntland ayaa Jimcihii soo saartay war-saxaafadeed ay ku cambaareysay qorshaha dib u eegista baarlamaanka federaalka ee ku aaddan doorashda 2016, iyagoo sheegay iney ula jeedadu tahay marmarsiyo ku aaddan wakhti korosi ay doonayaan xubnaha baaralmaanka.
Goobjoog News
