U bood dhigaalka

Somaliland: Boqor Raabbi oo Sheegay In Laga Hor istaagay Gudashada Waajibaadka Xajka iyo Laanta Socdaalka oo arrintaa Ka Hadashay

Sheeko:Dalka

Laanta socdaalka Somaliland  ayaa Airport-ka Hargeysa u diiday inuu ka dhoofo boqor Raabi  Cabdilaahi oo ay sheegtay in gudaha madaarka uu kula kulmi lahaa masuuliyiin ka tirsan xukuumadda Federaalka Soomaliya kuwaasi oo taransad ku ahaa gudaha madaarka isla markaana u sii gudbayey dhanka soo gudashada Xajka.

Boqor  Raabi ayaa  isagu markii hore warbaahinta u sheegay in loo diiday inuu soo guto Xajka isla markaana laga soo celiyey afaafka hore ee madaarka lana sii daayey dadkii uu la socday ee ay safarka Xajka ku wehlin lahaa.

maamulaha madaarka Hargeysa Maxamed Yuusuf ayaa sheegay in sababta loo celiyey boqorka ay ahayd inay ka warheleen in dawladda Sucuudigu  isaga iyo boqor Burhaan oo reer Puntland ah ay u xilsaartay soo amba bixinta Xujeyda ka tagaysa  Soomaaliya  taasi oo ku tilmaamay  inay Somaliland ka madax banaan tahay, “Hadalka  Boqorka ee ah   isaga oo gudanaya waajibaadkii Xajka amar kaga yimid Masuuliyiinta Wasaaradda darteed loogu diiday,  sababihii uu cuskanaayey waxa ka mid ahaa abaabul shirar reero ah oo warbaahinta iyo ummadda oo dhan u caddeynayaan, meel ama amar aanu kaga joojinay boqorka isagoo soo gudunaya waajibkooda haba yaraate waxaan halkan kaga caddeynayaa in aanay jirin, cid bixisay cid ka hor istaagtay iyo cid u diiday haba yaraate ma jirto. Balse arrinku uu ahaa inuu rabay in gudaha uu kula kulmo Xujey reer Soomaaliya ah oo waliba siyaasiyiin ah ” .

Maamulaha Airportka ayaa intaasi ku daray inay amarka bixisay laanta socdaalka ee Somaliland  isla markaana ay  siyaasadda Somaliland ka reeban tahay in  qof aan xukuumadda xilka hayn uu kulan siyaasadeed gudaha Somaliland kula qaadan Karin masuul Soomaaliya xil ka haya.

Todobaadkan gudihiisa ayaa baraha bulshada lagu faafiyey sawirro muujinaya masuuliyiin u badan madax ka tirsan dowladda federaalka oo gudaha madaarka Hargysa transad ahaa kuwaasi oo uu sawirrada uu kula jiray wasiirka Diinta iyo Awqaafta ee Soomaliland Sheekh Khaliil Cabdilaahi oo markii dambe isagu sheegay in kulankoodu ahaa un salaan guud ee aanuu ahayn mid siyaasadeed .

Boqorkan cabanaaya ayaa hore  waxa tiraba labo jeer loogu xiray magaaalada Hargeysa isaga oo  lagu eedeeyey inuu ka qaybqaatay xulista baarlamaanka Soomaaliya ee 2012 .

Goobjoog News