Kuuriyada Waqooyi oo xirtay afar qof oo lagu eedeeyay shil markab

Kuuriyada Waqooyi ayaa xirtay afar masuul oo ay ku eedeysay inay ka dambeeyeen shil toddobaadkii hore ka dhacay goob lagu magacaabo Chongjin Shipyard, halkaas oo markab dagaal oo cusub uu ku qalibmay, sida ay shaacisay Wakaaladda Wararka ee KCNA.

Mid ka mid ah dadka la xiray waa Ri Hyong Son, oo ah agaasime ku xigeenka waaxda warshadaha Munitions ee Golaha Dhexe ee Xisbiga Talada haya, kaasoo KCNA ku tilmaantay mid si weyn mas’uul uga ahaa dhacdada shilka weyn.

Saddex kale ayaa Axaddii la xiray, kuwaas oo kala ah: Kang Jong Chol, madaxa injineerka Chongjin Shipyard; Han Kyong Hak, madaxa aqoon-is-weydaarsiga dhismaha hull-ka; iyo Kim Yong Hak, maareeye ku xigeenka arrimaha maamulka.

Hoggaamiyaha dalka, Kim Jong Un, oo kormeer ku joogay goobta ayaa shilka ku tilmaamay “fal dambiyeed la qariyay”, wuxuuna ballan qaaday in la ciqaabi doono cid kasta oo mas’uuliyaddiisa leh.

Shilkan, oo dhacay Arbacadii la soo dhaafay, ayaa la sheegay inuu ka dhashay cilad ku timid habka loo dejinayay markabka, taasoo sababtay in markabku uu dhinac u dhaco oo waxyeello weyni soo gaarto sida lagu sheegay warbixin dhowaan soo baxday.