Ra’iisulwasaare Xamsa oo Safiirka Finland kulan ku yeeshay Muqdisho
Sheeko:War
Ra’iisulwasaaraha xukuumadda federaalka ah ee Soomaaliya Xamsa Cabdi Barre ayaa kulan la qaatay safiirka dalka Finland u fadhiya Soomaaliya.
Xamsa Cabdi Barre ayaa kala hadlay xaaladda dalka iyo sidii loo xoojin lahaa xiriirka labada dowladood, kaas ee ku qotama wadashaqeynta dhinacyada kala duwan leh.
“Ra’iisul Wasaaraha Xukuumadda Federaalka Soomaaliya, mudane Hamza Abdi Barre, ayaa maanta xafiiskiisa ku qaabilay safiirka Filand ee Soomaaliya, Pirkka Tapiola, oo ay ka wada hadleen xoojinta xiriirka labada dowladood iyo dadaallada dib-u-xoreynta ee dowladdu ay ku ciribtiteyso kooxda khawaarijta ah,” ayaa lagu yiri war ka soo baxay Xafiiska ra’iisulwasaaraha.
Pirkka Tapiola, ayaa dhankiisa bogaadiyay dadaalada ay waddo xukuumadda Soomaaliya ee lagu xuraynayo deegaannada ay ururka alshabaab ku sugan yihiin.
“Mr. Pirkka Tapiola ayaa bogaadiyay guulaha wax ku oolka ah ee laga gaaray kacdoonka dib-u-xoreynta, waxuuna caddeeyay in dowladda Filand ay joogteynesyo garab istaagga dadka iyo dowladda Soomaaliyeed,” ayaa lagu yiri war ka soo baxay Xafiiska ra’iisulwasaaraha.
Ra’iisulwasaraha Soomaaliya ayaa dhinaciisa kaga mahad celiyay dowladda Finland taageerada ay siiso dowlada federaalka ah ee Soomaaliya
“Ra’iisul Wasaaraha ayaa dowladda Filand uga mahad celiyay garab istaagga iyo taageerada joogtada ah ee ay ka geysato arrimaha horumarinta bulshada gaar ahaan waxbarashada iyo caafimaadka,” ayaa lagu yiri war ka soo baxay Xafiiska ra’iisulwasaaraha.
Goobjoog News