Xildhibaan Cabdiraxmaan Xoosh Jibriil oo ka tirsan baarlamaanka federaalka Soomaaliya oo wareysi gaar ah siiyay Goobjoog News ayaa dhaliilay guddiga heer faderaal ee doorashooyinka 2016 uu ku dhawaaqay madaxweyne Xasan Shaeekh isagoo ku tilmaamay khaladkii ugu weynaa ee doorashada.
Xildhibaanka ayaa hadalkiisa ku bilaabay in guddigu uu yahay sharci darro, Dastuurkana uu hareer marsan yahay:
“Aniga waxay ila tahay guddigaan la soo saaray oo loo bixiyay guddiga fulinta ee guddiga doorashada ee heer federaal, waxay ila tahay iney yihiin wax aan sharci ku saleysneyn, iney tahay wax dastuurka aan waafaqsaneyn, ayna tahay wax fashilin doona iney dhacdo doorasho xaq ah, daahfuran, is afgarad ah, la iskuna halleyn karo oo la dhihi karo wax lagu wada heshiiyay ayaa soo baxay”.
Doorashada soo aaddan ayuu ku tilmaamay tii ugu muhiimsaneyd ee Dalka:
“Doorashadan hadda la galayo waa doorashadii ugu muhiimsaneyd ee Soomaaliya soo marta waaye, maxaa yeelay; intaas ayaan soo gurguuraneynay, dhibaataan soomarnay, dagaallo qabiil, markii la rabay in waxaas oo dhan laga baxo waxay ahayd 2012, xukuumaddan hadda joogta waxaa la siiyay 4sano iney soo diyaariso in waddanka la gaarsiiyo hal qof hal cod, waa ku fashilantay taas, waxaa ceeb noqotay maanta la yiraahdo haddaan ka wadahadleynaa sidii loo sameyn lahaa doorasho, macneheedu waa fashilanay, beesha caalamkuna waa la fashilantay”.
Waxa uu dib u xasuustay sanadkii 2012 iyo inaan guddigii xulitaanka baarlamaanka lagu darin gole fulin:
“Haddaan rabno inaan doorasho tagno, waa iney noqotaa tii 2012-kii mid ka hannaan wanaagasan, waana lagu ballamay taas, hase yeeshee waxaad moodaa tii mid kasii liidata inaan aadayno, 2012 waxaan hormuud ka ahaa doorashada dalka, dadkii doorashada hagaayay ee guddiga xulitaanka baarlamaanka hal qof oo dowladda ku jiray ma jirin, qof agaasime ah kuma jirin qof wasiir ah kuma jirin, kulli waxay ahaayeen bulshada rayidka ah”.
Dadka uu madaxweynuhu soo magacaabay ayuu ku tilmaamey dad isaga aad ugu dhaw:
“Maanta madaxweynuhu waxa uu soo magacaabay guddi waasiirro, saaxiibbo iyo kuwo ka shaqeeya xafiiska madaxweynaha, kuligood saaxiibadii ah kuligood uu dano ka leeyahay, waxaas oo kale lama yiraahdo doorasho xor ah ayaa la gaarayaa”.
Guddigani haddii uu khaldamo ayuu sheegay in inta ka hoosaysa aan wanaag laga fileyn:
“Guddiga heer federaal ee fulinta doorashada kaas haddii uu khaldan yahay wixii kasii hooseeyaa oo dhani waa khaldan yihiin, khaladkii ugu weynaa waaye, ma garan karo sababta wasiirro fulinta ka socda iyo saaxiibada madaxweynaha iney fadhiyaan heerkii ugu sarreyay ee doorashada, madaxweynihiina uu rabo inuu madaxweyne noqdo, ra’iisul wasaarihiina uu rabo inuu madaxweyne noqdo, wasiirada ku jiraana ay xildhibaanno noqdaan”.
Madaxweynaha dowladda Federaalka Soomaaliya Xasan Sheekh Maxamuud ayaa magacaabay guddiga doorashada heer faderaal 15/Juun.2016, kaas oo ah kan ugu sarreya doorashada dalka ee 2016.
Goobjoog News
