Xildhibaan Faah Faahin Ka Bixiyey Mooshin Dhawaan Loo Gudbiyey Guddoonka Baarlamaanka Soomaaliya
Xildhibaan Maxamuud Macallin Yaxye oo ka tirsan baarlamaanka Federaalka Soomaaliya ayaa Goobjoog uga warbixiyay Mooshin cusub oo ay baarlamaanka geeyeen iyo ula jeedada dhabta ah ee ka dambeysa.
Xildhibaanka ayaa ugu horreyn ka warbixiyay mooshinka waxa uu yahay iyo ula jeedada ka dambeysa, waxa uu yiri:
“Waxa uu ahaa mooshin ay go’aansadeen qaar ka mid ah golaha shacabka, ula jeedadu waxay tahay, maadaama ay dalkeena wali dib u heshiisiintii aanay dhameys tirmin cabasho badanna ay jirtay tan iyo xilliyadii la bilaabay dib u yegleelidda dowladda Soomaaliya waxaa jiray beelo ka tirsan beelaha Soomaaliyeed oo cabasho qabay, golaha shacabka aan ku lahayn matalaad, sidaa daraadeed ayaan ku keenay hadaan nahay golihii shacabka waxay noola muuqatay inay lagama maarmaan tahay cabashada dadka Soomaaliyeed qaarkood qabaan in laga jawaabo”.
Xildhibaanada Mooshinkan saxiisay ayuu ku sheegay, xil. Maxamuud, inay gaarayaan illaa 83 xubnood, waana tiro miisaan leh marka loo eego baarlamaanka federaalka Soomaaliya.
Waxa uu xildhibaanku xusay in beelaha cabanayaa ay yihiin tiro aan yarayn, laakiin haddii si dhab ah loogu istaago wax laga qaban karo, oo haddii baarlamaanka soo socda 10-15 xubnood lagu kordhiyo beelaha cabanayana in arrinkaasi yahay xalka ugu habboon ee la sameyn karo.
Waxa uu xildhibaan Maxamuud Macallin Yaxye sheegay Haddii mooshinka la isla qaato in waxa soo haraa ay farsamo yihiin, farsamana waa la isla fahmi karaa, waxa uuna tusaale u soo qaatay in Carta lagu soo heshiiyay 275 xildhibaan, kadibna ay suurtogashay in baarlamaanka la furo.
Dad Soomaaliyeed oo illaa 2000 matalaadii golaha shacabka laga qadiyay, canshuurtii dalka laga qaadayo, oo kula jooga dalkalana aan haysan, waa lagama maarmaan dadkaa in arrinkooda si dhab ah loo fiiriyo Soomaalina ay cabashadooda ka jawaabto.
Si kastaba Mooshinka ayaa laga diiwaan geliyay Baarlamaanka Federaalka ah Sabtidii aan soo dhaafnay, iyadoo guddoonka baarlamaanku uu sheegay in xeer hoosaadka la marin doono, kadibna sida sharcigu yahay loo soo bandhigi doono golaha shacabka si ay uga doodaan, ugu dambeynna ay ogolaadaan ama ay wakhti kale dib ugu dhigaan.
Goobjoog News