Ruushka: Waxaan Diyaar u Nahay Inaan Baal Cusub oo Xiriir Fiican ah La Furno Dalka Mareykanka

Ra’isul wasaaraha dalka Ruushka Dmitry Medvedev ayaa sheegay in dalkiisu uu ixtiraamayo doonista shacabka Mareykanka oo doortay Donald Trump inuu u noqdo madaxweynaha cusub ee dalkaas maamulaya, waxaana uu xusay iney dhankooda diyaar u yihiin in ay xoojiyaan xiriirkooda madaxweynaha cusub ee la doortay.

Medvedev oo la hadlay warbaahinta dalkiisa ayaa yiri; “Adkeynta xiriirka Ruushka iyo Mareykanka waxay ku xiran tahay doonista maalmulka Mareykanka”.

Waxa uu intaa sii raaciyay ; “Haddii ay diyaar u noqdaan inaan iskaashigeenna kor u qaadno oo aan baal cusub aan furanno oo ka heer sarreysa sidii hore, taariikhda xun ee ay horseedeen maalmulka hadda Mareykanka ka jiraa laga gudbo, annaguna diyaar ayaan markaa u nahay inaan xiriirka hagaajinno”.

Ra’isul wasaaraha waxa uu ku tilmaamay hannaanka doorashada Mareykanka  in uu horseeday in uu soo boxo musharax aan la saadaalineyn inuu soo baxi karo.

Goobjoog News