U bood dhigaalka

Saameynta dalalka Bariga Afrika ee Xanuunka sii fidaya ee Furuqa Daanyeerka

Sheeko:Maqaallada Goobjoog

Xanuunka Furuqa Daanyeerka Mpox (hore loogu yaqaanay monkeypox) waa cudur fayras ah oo ku faafo xiriirka dhow ee lala yeesho qof bukaan ah, walxaha uu taabtay, ama xayawaanka qaada fayraska.

Cudurkani waxa uu sababi karaa qandho, finan, iyo qanjidhada oo barara.

Inkastoo hore looga helay galbeedka iyo bartamaha Afrika, cudurka ayaa hadda ku sii fidaya gobollo badan, sababo la xiriira yareynta tallaalka iyo baadhitaanka fayraska.

Kenya ayaa xaqiijisay dhimashadii ugu horreysay ee ka dhalata cudurka mpox, iyadoo 13 xaaladood laga diiwaangeliyey 11 degmo oo ay ku jiraan magaalooyinka waaweyn sida Nairobi, Mombasa, iyo Nakuru.

Mas’uuliyiinta caafimaadka ayaa baadi-goobaya 68 qof oo lala xiriiriyay bukaannada, waxaana saddex ka mid ah laga helay cudurka.

Cudurkan ayaa Bariga Afrika ka sii faafaya sannadkan 2024.

Kenya, Uganda, Rwanda, iyo Burundi ayaa dhamaantood soo weriyey kiisaska cudurkan, iyadoo Jamhuuriyadda Dimuqraadiga ah ee Congo (DRC) ay noqotay dalka ugu daran oo ilaa 90% kiisaska Afrika laga diiwaangeliyay.

DRC ayaa sidoo kale soo sheegtay nooc cusub oo fayraska ah oo ku baahay bariga dalka tan iyo Sebtembar 2023, taas oo ka sii dartay xaaladda gobolka.