WASHINGTON (Goobjoog News) — Madaxweynaha Mareykanka, Donald Trump, ayaa ku baaqay in dhammaan dalalka xubnaha ka ah Maxkamadda Dambiyada Caalamiga ah (ICC) ay si degdeg ah uga baxaan maxkamaddaas.
Baaqan cusub ee uu soo saaray Trump ayaa qayb ka ah cadaadiska joogtada ah iyo mucaaradnimada adag ee uu hore ugu hayay maxkamadda fadhigeedu yahay magaalada Hague, isagoo ku dooday in hay’addani ay ka gudubtay awooddeeda sharciga ah ayna bartilmaameedsato danaha dalalka madaxa-bannaan iyo hoggaamiyeyaashooda.
Hadalka Trump ayaa ku soo beegmaya xilli maxkamadda ICC ay waddo dacwado iyo baaritaanno xasaasi ah oo la xiriira dambiyo dagaal iyo kuwo ka dhan ah bini’aadannimada, kuwaas oo qaarkood si toos ah u taabanaya xulafada Mareykanka iyo xiisadaha ka taagan gobollo kala duwan oo caalamka ah.
Baaqan ayaa la filayaa inuu falcelin xooggan ka dhex dhaliyo dowladaha xubnaha ka ah heshiiskii Rome Statute ee lagu aasaasay ICC, gaar ahaan waddamada reer Yurub iyo hay’adaha u dooda caddaaladda caalamiga ah, kuwaas oo maxkamadda u arka tiir muhiim u ah la-xisaabtanka dambiyada dagaalka.