Liban Hirsi

Madaxweynaha maamulka Jubbaland Axmed Madoobe ayaa wareegto uu soo saaray mar kale ku magacaabay Madaxweyne Kuxigeenka koowaad iyo labaad oo loo kala magacaabay Maxamuud Sayid Aadan iyo C/qaadir Xaaji Maxamuud Luga Dheere kuwaasoo horay u joogay Xafiiska.

Ciidamada ammaanka dowlad goboleedka Galmudug ayaa gacanta ku soo dhigey nin loo haysto dilka sargaal ka tirsanaa ciidamada oo lagu toogtay magaalada dhuusamareeb.

Wasiirka Arrimaha dibadda ee Soomaaliya Danjire Axmed Macallin Fiqi, ayaa kulan heer sare ah la yeeshay  dhiggiisa Masar Dr. Badr Abdel Aty, waxaana kulankooda oo ka dhacay magaalada Qaahira diiradda lagu saaray xoojinta xiriirka laba geesoodka ah iyo raadinta fursado iskaashi oo cusub, iyada oo lagu heshiiyay in xiriirka la gaarsiiyo heer istiraatiijiyadeed, labada dhinac ayaana isku afgartay in la xoojiyo iskaashiga ganacsiga iyo dhaqaalaha, iyadoo loo marayo Madasha Soomaaliya iyo Masar, oo lagu qaban doono Qaahira Janaayo 2025. 

Wefdi ka socda dowladda Soomaaliya oo uu hoggaaminayo Wasiiru-Dowlaha Arrimaha Dibadda, Mudane Cali Maxamed Cumar (Cali Balcad), ayaa maanta gaaraya magaalada Addis Ababa ee caasimadda dalka Ethiopia, si ay u sii ambaqaadaan heshiiskii Ankara ee dhexmaray madaxda labada dal.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa Madaxtooyada Qaranka ku qaabilay Safiirka Talyaaniga ee Soomaaliya Mudane Pier Mario Daccò Coppi.

Idaacadda ciidamada Israa’iil ayaa sheegtay in 3 askari oo Israa’iiliyiin ah ay dhaawacyo kala duwan soo gaareen, kuwaas oo mid ka mid ah ay xaaladdiisu halis tahay, ka dib markii taangi marayey marinka Qasa qaraxyo bumbo lala eegtay.

Dowlad goboleedka Puntland ayaa dhowaan shaacisay in sanadka soo socda lacag u gaar ah ay samaysan doonto, ka dib markii la waayay lacag qaran oo hannaanka federaalka ee dalku qaatay la jaanqaadi karta sida uu sheegay madaxweynaha maamulkaasi.

Madaxweynaha la doortay ee Mareykanka Donald Trump ayaa sheegay inuu isbadel weyn ku samayn doono siyaasadda arrimaha dibedda ee dalkiisa, islamarkaana uu soo afjari doono dagaallada ka socda meelo badan oo caalamka kamid ah.

Dowladda Federaalka Soomaaliya ayaa dowladda Rwanda kala wareegtay Hoggaanka Ciidanka Heeganka ee Bariga Afrika (EASF) oo ah urur goboleed uu waajibaadkiisu yahay kor u qaadista nabadda iyo ammaanka gobolka Bariga Afrika, kana mid ah shanta ciidan goboleed ee ciidamada heeganka ah ee Afrika (ASF) oo ka kooban militari, boolis iyo qaybo rayid ah.

Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo ka qayb-galay, Xuska sannad guurada 81-aad ee ka soo wareegtay aasaaskii Ciidanka Booliiska Soomaaliyeed ayaa hamblyo u diray Sarreeyaasha, Saraakiisha sare, Saraakiisha, Saraakiil xigeenada, Kormeerayaasha, Alifleyda iyo Dableyda Ciidanka Booliska Soomaaliyeed.