Ciidamada Howlgalka Midowga Yurub oo Gacanta Ku Dhigay 6 Qof oo Looga Shakisan Yahay Burcad Badeed

Ciidamada badda Yurub ayaa xabsiga dhigay Jimcihii lix qof oo looga shakisan yahay inay yihiin burcadbadeed kaddib markii ay usoo dhawaadeen markab shidaal oo marayay gacanka Cadmeed, sida ay saraakiishu sheegeen.

Saraakiisha waxa ay sheegeen in loo badinayo inay qayb ka tahay weerarrada sii kordhaya ee burcadbadeedda ee ka imaanaya Soomaaliya.

Qorshahan ayaa ka dhacay meel qiyaastii 100 nautical miles waqooyi ka xigta Boosaaso, Soomaaliya, iyo galbeedka jasiiradda Socotra, Yemen, halkaas oo hawlgallada ammaanku ay ka digeen in kooxaha burcad-badeedda ahi ay firfircoon yihiin.

“Saaka ayaa doon yar oo ay saarnaayeen lix qof ku soo dhawaaday markabka Chrystal Arctic (74,900 dwt). Markabkan oo ka diiwaan gashan Jaziirada Marshall ayaa ku wajahnaa dhanka galbeed ee dalka Masar isagoo safar kaga yimid dalka Hindiya, waxaana suurtagashay in la qabto” ayaa lagu yiri war kasoo baxay howlgalka.

Ciidanka ayaa intaasi kusii daray in shaqsiyaadka la socday doonta yar ay wateen hub iyo jaranjaro.

Horraantii toddobaadkan Xarunta Iskaashi iyo Wacyigelinta Macluumaadka Badaha ayaa ka digtay in suurtagalnimada in burcad-badeed ay ka howlgalaan meel qiyaastii 350 nautical miles bari ka xigta magaalada Socotra.

Todobaadki hore, howlgalka Atalanta ayaa ka digay inuu rumeysan yahay inay gobolka ka jiraan ugu yaraan labo kooxood oo burcad badeed ah. Intii lagu jiray bishii Abriil waxay sheegeen inay jireen afar isku day oo laga shakiyay, tan iyo Noofambar 2023-kii waxay diiwaangeliyeen wadar ahaan 31 dhacdo.