Madaxweynaha Maraykanka, Donald J. Trump, ayaa ku dhawaaqay in weerarradii la qorsheeyay ee lagu qaadi lahaa warshadaha korontada iyo kaabayaasha tamarta ee Iran ay dib u dhacayaan muddo shan maalmood ah.
Go’aankan wuxuu yimid kadib wadahadallo dhowr maalmood socday oo uu Madaxweynaha Maraykanka la yeeshay mas’uuliyiinta Iiraan, kuwaas oo uu sheegay inay ahaayeen kuwo “wax ku ool ah.
Trump wuxuu sheegay in dib u dhaca howlgalka milatari uu ku xiran yahay guusha wadahadallada socda ee la filayo inay usbuuca oo dhan sii socdaan.
Wuxuu intaas ku daray in tallaabadan ay tahay mid ka tarjumaysa rajada ah in la gaaro xallin dhammeystiran oo khilaafaadka ka jira Bariga Dhexe, balse aysan macnaheedu ahayn joojinta khilaafka ama dagaalka mustaqbalka.
Warbixinnadu waxay tilmaamayaan in suuqyada caalamka ay si toos ah uga falceliyeen warkaan, iyadoo saamiyada iyo sicirka saliida ay muujiyeen isbeddel, maadaama cabsi laga qabay dagaal degdeg ah ay yaraatay. Tani waxay sidoo kale muujineysaa sida siyaasadda iyo wadahadalka diblomaasiyadeed ee Maraykanka iyo Iiraan ay saameyn toos ah ugu leeyihiin dhaqaalaha iyo ammaanka gobolka.
Wada-hadalladan ayaa imaanaya iyadoo xiisadda u dhaxaysa Maraykanka, Iiraan, iyo dalalka kale ee gobolka ay kor u kacday todobaadyo la soo dhaafay, taas oo keentay cabsi laga qabo weerarro milatari iyo faragelin caalami ah.
Madaxweyne Trump ayaa muujiyay in dadaalka diblomaasiyadeed uu yahay fursad muhiim ah oo lagu yareynayo khilaafaadka, iyadoo dhageysiga iyo wadahadallada lagu wada hadlayo arrimaha muhiimka ah ee gobolka sida ka hortagga dagaalada iyo ilaalinta maraakiibta muhiimka ah.