Ra’iisul Wasaaraha Pakistan, Shehbaz Sharif, ayaa sheegay in dadaallo buuxa ay weli socdaan si xal nabadeed loogu helo dagaalka u dhexeeya Mareykanka iyo Iiraan, kaddib wada-hadallo horraantii Todobaadkan lagu qabtay magaalada Islamabad oo ku dhammaaday natiijo la’aan.
Sharif ayaa muujiyay in inkasta oo wada-hadalladii u dhexeeyay labada dhinac ay fashilmeen, haddana rajo laga qabo in xal diblomaasiyadeed la gaari karo ay weli jirto.
Wuxuu xusay in Pakistan ay sii wadi doonto kaalinteeda ku aaddan fududeynta wadahadallada iyo yareynta xiisadda sii kordheysa ee gobolka.
Wada-hadalladan oo dhacay maalin ka hor ayaa ahaa isku day cusub oo lagu doonayay in lagu dejiyo xaaladda cakiran ee u dhaxeysa Washington iyo Tehran, taasoo sii hurisay walaac xiisadda gobolka.
Wararka ayaa intaas ku daraya in ilo diblomaasiyadeed ay tilmaameen in qodobo muhiim ah oo ay isku hayaan labada dhinac ay weli taagan yihiin, taasoo caqabad ku noqotay in wax heshiis ah la gaaro. Si kastaba, dadaallada socda ayaa muujinaya in beesha caalamku ay ka go’an tahay ka hortagga isku dhac militari.