In kasta oo 15-kii May ay ku beegnayd xilligii uu ku eg yahay muddo xileedka rasmiga ah ee afarta sano ee dowladda hadda jirta, haddana waxaa madaxtooyada Soomaaliya laga dareemayaa dhaqdhaqaaq dibloomaasiyadeed oo aad u ballaran.
Maalmihii la soo dhaafay, Madaxweyne Xasan Sheekh Maxamuud wuxuu Villa Somalia ku qaabilay dhowr safiir oo matalaya quwado waaweyn, kuwo gobolka ah iyo saaxiibbada caalamiga ah ee dalka, taas oo dhalisay hadal-hayn iyo falanqeyn ku saabsan ujeeddada ka dambaysa dardartan cusub ee ku soo aaday xilli kala-guur ah.
Kulammadan is-daba-joogga ah ee dhexmaray hoggaanka dalka iyo dibloomaasiyiinta caalamiga ah waxaa loo falanqayn karaa laba dhinac oo muhiim ah, kuwaas oo kala ah gudashada shaqooyinka caadiga ah ee dowladda si looga fogaado firaaq maamul, iyo dirista farriin siyaasadeed oo ku saabsan sii-socoshada xiriirka caalamiga ah ee dalka.
Haddaba, haddii loo kuur-galo kulammadii u dambeeyay ee ka dhacay Villa Somalia, waxay koobayeen dhinacyo kala duwan oo muhiim u ah iskaashiga caalamiga ah ee Soomaaliya.
Madaxweynuhu wuxuu marka hore qaabilay Safiirka Jamhuuriyadda Shacbiga ah ee Shiinaha, Wang Yu, iyadoo kulankaas dib loogu xaqiijiyay mowqifka Soomaaliya ee ku aaddan midnimada Shiinaha, halka uu dhanka kalena kulan sagootin ah la qaatay Safiirkii dalka Ruushka, Mikhail Golovanov, ka dib markii uu dhammaaday muddo xileedkiisii dibloomaasiyadeed.
Sidoo kale, wadahadallada lala yeeshay Safiirka Midowga Yurub, Francesca Di Mauro, waxay salka ku hayeen dib-u-eegista iskaashiga istiraatiijiga ah iyo mashaariicda horumarineed, halka dhanka gobolka iyo xulafada dhow uu Madaxweynuhu warqadaha aqoonsiga ka guddoomay Safiirka cusub ee Jabuuti, Osman Doubad Sougouleh, iyo kulan kale oo uu la qaatay Safiirka Turkiga, Alper Aktaş, si loo xoojiyo iskaashiga dhanka amniga iyo difaaca.
Kormeerayaasha siyaasadda iyo dadka u kuur-gala arrimaha dibadda ayaa tilmaamaya in laba ujeeddo ay ka dambayn karaan kulammadan badan ee xilligan ku soo aaday. Tan koowaad waxay tahay in marka ay dowladuhu qarka u saaran yihiin kala-guur ama doorashooyin uu badanaa yaraado dhaqdhaqaaqa rasmiga ah, sidaa darteedna qaabillidda safiirradan badan ay muujinayso in madaxweynuhu uu rabo inuu sii wado shaqadiisa caadiga ah si caalamka loogu muujiyo inaanay jirin wax hakin ah.
Tan labaadna waa xaqiijinta kalsoonida caalamiga ah, iyadoo kulammadu ay farriin u yihiin gudaha iyo dibaddaba in dowladda hadda jirta ay weli tahay tan rasmiga ah ee maamusha xiriirka dibadda, saaxiibbada caalamkuna ay diyaar u yihiin inay sii wadaan wadashaqaynta ay la leeyihiin hay’adaha dowladda ee hadda jira si aanay u istaagin mashaariicda muhiimka ah ee amniga iyo dowlad-dhiska.
Inkasta oo waqtigii rasmiga ahaa ee muddo xileedka dowladda uu dhammaaday 15-kii May, haddana firfircoonida dibloomaasiyadeed ee ka jirta Villa Somalia waxay muujinaysay in shaqadii qaranka ay weli u socoto nidaam caadi ah. Arritan waxay dhinac ka tahay gudashada waajibaadka maalinbaha ah ee horyaalla hoggaanka dalka, dhanka kalena waxay muujinaysaa dadaalka Madaxweyne Xasan Sheekh Maxamuud ee ku aaddan inaanay wax hakad ah ama madow ahi gelin xiriirrada muhiimka ah ee dalku la leeyahay caalamka xilli lagu jiro marxalad kala-guur ah.